Bentley ka zgjedhur një mënyrë të pazakontë për t’i dhënë emocion automjetit të saj të ri elektrik, duke mos përdorur një zhurmë artificiale motori, por një orkestër të plotë muzikore.
Prodhuesi britanik ka krijuar kolonën zanore “Bentley Dynamic Symphony” për SUV-in e ardhshëm elektrik Torcal, me synimin për të rikrijuar ndjesinë e një motori tradicional V8, edhe pse automjeti do të jetë plotësisht elektrik.
Ndryshe nga shumë prodhues që përdorin tinguj elektronikë të krijuar nga kompjuteri, Bentley ka përdorur instrumente reale për të kopjuar ritmet dhe tonalitetet që e bëjnë tingullin e motorëve me djegie të brendshme kaq karakteristik.
Për krijimin e kësaj përvoje akustike, ekipi i Bentley regjistroi tingullin e një motori V8 në studio dhe analizoi elementët që e bënin atë të veçantë.
Në orkestër u përfshinë bateritë, të cilat u konsideruan si elementi kryesor për të imituar ndjesinë e fuqisë së motorit, por edhe instrumente të tjera si kitarat bas dhe violat.
Me këtë projekt, Bentley synon të ruajë emocionin dhe karakterin e makinave luksoze sportive edhe në epokën e elektrifikimit, ku heshtja e motorëve elektrikë shpesh shihet si një sfidë për pasionin e drejtimit./et