“Clair Obscur: Expedition 33”, një RPG i zhvilluar nga studio franceze Sandfall Interactive, u shpall Loja e Vitit në ceremoninë prestigjioze The Game Awards 2024, duke u bërë një nga fituesit më dominues në historinë e eventit. Loja rrëmbeu 9 nga 10 çmimet ku ishte nominuar, përfshirë narrativën, muzikën dhe performancën më të mirë.
Konkurrenca ishte e fortë, me tituj të njohur si Death Stranding 2, Donkey Kong Bananza, Hollow Knight: Silksong, Hades 2 dhe Kingdom Come: Deliverance 2 që synonin çmimin kryesor.
Gjatë eventit në Los Angeles, fansat panë për herë të parë pamje nga dy lojëra të reja Tomb Raider, vazhdimi Control Resonant dhe një RPG i ri në universin Star Wars. Po ashtu u prezantuan trailerat e parë të disa titujve shumë të pritur, si Divinity nga Larian Studios, Resident Evil 9 dhe PS5-shooteri Saros.
Loja zhvillohet në një botë fantastike të sunduar nga një qenie e mbinatyrshme, The Paintress, e cila ndalon njerëzit të rriten pas një moshe të caktuar. Historia ndjek një grup aventurierësh në kërkim të shkatërrimit të saj.
Ajo u vlerësua për narrativën emocionale, stilin e betejave me turne dhe tonin artistik të veçantë. Studioja Sandfall Interactive është krijuar nga ish-punonjës të Ubisoft, të cilët braktisën kompaninë e madhe për të ndjekur projektin e tyre personal.
Lorien Testard, kompozitori i lojës, fitoi çmimin për muzikën dhe kolonën zanore më të mirë, ndonëse ky ishte debutimi i tij. Ai u zbulua nga kompozimet e publikuara në SoundCloud. Loja mori edhe titujt për RPG më të mirë, loja më e mirë dhe debutimi më i mirë.
Aktorja Jennifer English fitoi çmimin për performancën më të mirë si Maelle, duke ia dedikuar atë “çdo personi neurodivergjent”.
“Clair Obscur” humbi vetëm dy çmime: “dizajni më i mirë audio”, që shkoi për Battlefield 6, dhe “Player’s Voice”, të fituar nga Wuthering Waves.
Fitues të tjerë të mbrëmjes
Donkey Kong Bananza – Loja familjare më e mirë
Arc Raiders – Loja më e mirë multiplayer
Hollow Knight: Silksong – Aksion-aventurë më e mirë
Umamusume: Pretty Derby – Loja më e mirë mobile
Game Awards, shpesh i quajtur “Oscarët e lojërave”, prej vitesh kritikohet për fokus të tepruar te reklamat. Këtë vit pati përmirësime, por zhvilluesit vazhduan të kërkojnë më shumë vëmendje për problemet e industrisë, sidomos valët e shkurtimeve të vendeve të punës.
Gjithashtu ka pasur kritika për heqjen e programit Future Class, që synonte të promovonte talentet e reja në sektor. Iniciativa u pezullua pas vitit 2023, duke ngjallur pakënaqësi te pjesëmarrësit e mëparshëm.
Vitin e kaluar, çmimi “Game Changer” iu dha Amir Satvat, i cili ndihmon zhvilluesit e pushuar nga puna të gjejnë mundësi të reja. Organizatorët e Game Awards nuk kanë dhënë ende një koment lidhur me kritikat e këtij edicioni./K.M