Last Updated on 09/09/2026 by EL
Deficiti buxhetor i Katarit u rrit me më shumë se dyfish në tremujorin e dytë të vitit 2026, në një kohë kur ndërprerjet e eksporteve të gazit natyror të lëngshëm (LNG) po ushtrojnë presion mbi të ardhurat e vendit.
Sipas Ministrisë së Financave të Katarit, deficiti arriti në 21.2 miliardë rialë (rreth 5 miliardë euro) në tremujorin e dytë, nga 10.3 miliardë rialë (2.44 miliardë euro) në tremujorin e parë.
Të ardhurat totale në tremujorin e dytë ishin rreth 25.6 miliardë rialë (6.06 miliardë euro), ndërsa shpenzimet arritën në 46.9 miliardë rialë (11.1 miliardë euro).
Me rezultatet e dy tremujorëve të parë, deficiti për gjysmën e parë të vitit është ngjitur në 31.5 miliardë rialë (7.45 miliardë euro), duke tejkaluar tashmë parashikimin fillestar prej 21.8 miliardë rialësh (5.16 miliardë euro) për të gjithë vitin 2026.
Doha mohon shkurtimet e pagave
Më 25 gusht, zëdhënësi i Ministrisë së Jashtme të Katarit, Majed al-Ansari, kundërshtoi raportimet për shkurtime të mëdha të shpenzimeve qeveritare.
Ai sqaroi se uljet deri në 30% lidhen vetëm me shpenzimet operative dhe nuk prekin pagat apo projektet kapitale. Sipas tij, masat janë të përkohshme dhe u ndërmorën si masë paraprake pas nisjes së krizës rajonale.
Ndërpriten dërgesat e LNG-së drejt Europës
Problemet kanë prekur edhe furnizimet me gaz të Katarit drejt Europës.
Kompania italiane e energjisë Edison njoftoi më 28 gusht se QatarEnergy kishte zgjatur deklarimin e “force majeure” për furnizimet deri në fillim të nëntorit. Numri i ngarkesave LNG të prekura në kuadër të kontratës së furnizimit me Edison ka arritur në 29.
Edison tha se mund të sigurojë furnizime alternative me gaz dhe të vazhdojë përmbushjen e detyrimeve ndaj klientëve.
Ndërkohë, të dhënat e gjurmimit të anijeve të publikuara më 7 shtator treguan gjashtë transportues LNG të lidhur me Katarin, bosh ose në drejtim të Gjirit të Omanit. Një tjetër anije bosh kishte kaluar ngushticën e Hormuzit në drejtim të Katarit.
Sipas të njëjtave të dhëna, 15 transportues LNG të ngarkuar ndodheshin ende brenda Gjirit, ndërsa dy anije bosh ishin kthyer pasi iu afruan ngushticës së Hormuzit./et