Pekini thotë se Kina është tashmë eksportuesja më e madhe dhe importuesja e dytë në botë.
Eksportet mujore të automjeteve të Kinës kaluan mbi 1 milion makina në qershor, duke shënuar një rekord të ri, si pjesë e një rritjeje të përgjithshme të tregtisë që pritet të shtojë tensionet me partnerë si Bashkimi Europian.
Dërgesat e automjeteve u rritën me 71.2% krahasuar me një vit më parë, duke arritur në 1.06 milion njësi. Kjo e vendos Kinën në rrugën për të eksportuar më shumë se 10 milion makina këtë vit, nga 7.1 milion vitin e kaluar dhe më shumë se dyfishi i 4.9 milionëve të eksportuara në vitin 2023.
Eksportet e përgjithshme u rritën me 27% në qershor krahasuar me të njëjtin muaj të një viti më parë, kundrejt rritjes prej 19.4% në maj dhe parashikimit prej 18.2% në një sondazh të analistëve të Reuters. Rritja u mbështet edhe nga eksportet e pajisjeve teknologjike të lidhura me bumin e inteligjencës artificiale.
Importet u rritën me 36%, sipas të dhënave të Administratës së Përgjithshme të Doganave të Kinës.
Suficiti tregtar i Kinës arriti në 576 miliardë dollarë në gjysmën e parë të vitit, me një rënie prej 4.7% krahasuar me një vit më parë.
Wang Jun, zëvendësministër i Zyrës Kombëtare të Statistikave, tha se rritja e automjeteve elektrike ishte në përputhje me “tranzicionin global drejt emetimeve të ulëta të karbonit”, i cili po nxiste kërkesën për “produktet e gjelbra të Kinës”.
“Ne nuk jemi vetëm eksportuesi më i madh në botë, por edhe importuesi i dytë më i madh në botë.”, tha Lyu Daliang, zëdhënës i Doganave të Kinës.
Eksportet kineze të mineraleve të rralla ranë me 34% në qershor krahasuar me një vit më parë dhe me 6.4% gjatë gjysmës së parë të vitit, pas vendosjes së kontrolleve të rrepta për eksportin e këtyre mineraleve, të cilat janë thelbësore për produktet e teknologjisë së lartë.
Kina dominon prodhimin e mineraleve të rralla dhe kufizimet e saj janë një burim i veçantë tensioni me partnerët tregtarë.
Wang nga Zyra Kombëtare e Statistikave tha se eksportet kineze të produkteve të lidhura me energjinë e gjelbër, si bateritë me litium dhe turbinat me erë, u rritën përkatësisht me 37.6% dhe 35.6% gjatë gjysmës së parë të vitit.
Importet e Kinës u mbështetën nga çipat. Në qershor 2026, vendi importoi 53.7 miliardë njësi qarqesh të integruara, 6.8% më shumë se një vit më parë. Gjatë gjysmës së parë të vitit, importet e çipave u rritën me 8.1%.
Orientimi i industrisë kineze të automjeteve drejt eksporteve vjen në një kohë kur shitjet në tregun vendas po ngadalësohen ndjeshëm, pas përfundimit gradual të subvencioneve për automjetet elektrike dhe rënies së kërkesës për makinat me karburant.
Ngadalësimi i shitjeve të brendshme ka bërë që markat kineze dhe të huaja të automjeteve të rrisin eksportet. Kjo ka nxitur Bashkimin Europian dhe vende të tjera të vendosin tarifa të larta ndaj importeve të makinave kineze.
Vala e eksporteve kineze është nxitur nga automjete me kosto më të ulët dhe programe kompjuterike më të avancuara, duke shtuar presionin ndaj prodhuesve të makinave nga Japonia, Koreja e Jugut, Europa dhe Shtetet e Bashkuara.
Kjo ndodh pavarësisht akuzave në Europë dhe në tregje të tjera se Kina po përdor subvencione të padrejta dhe të paligjshme për të mbështetur prodhimin vendas.
Vitet e para të bumit të eksporteve kineze të automjeteve, në fillim të viteve 2020, u dominuan nga prodhuesit shtetërorë, të cilët dërgonin makina të lira me karburant drejt tregjeve si Rusia, Meksika dhe vende të tjera në zhvillim.
Deri në vitin 2021, automjetet elektrike përbënin vetëm rreth 15% të eksporteve të makinave të Kinës, por situata po ndryshon me shpejtësi, ndërsa prodhuesit kinezë të automjeteve elektrike po zgjerohen fuqishëm në tregjet globale.
Ndër kompanitë që po nxisin këtë bum eksportesh, BYD shiti 175 mijë makina jashtë vendit në qershor, 95% më shumë se një vit më parë. Shitjet ndërkombëtare përbënin një rekord prej 43% të prodhimit total të kompanisë gjatë muajit të kaluar.
Geely raportoi 102,874 automjete të shitura jashtë vendit në qershor, me një rritje prej 157%. Kjo ishte hera e parë që eksportet mujore të kompanisë kaluan 100 mijë njësi.
Chery, e mbështetur nga shteti, eksportoi 191,062 automjete në qershor, 80% më shumë se një vit më parë. Kompania vendosi për të katërtin muaj radhazi një rekord të ri për eksportet mujore të një prodhuesi kinez automjetesh.
Përveç automjeteve elektrike, dërgesat e lokomotivave elektrike u rritën me 45.1%, ndërsa ato të motoçikletave dhe biçikletave elektrike me 31.5%, sipas Wang./ Financial Times-ad