Presidenti turk, Tayyip Erdogan, tha se forcat kurde në veri të Sirisë duhet të dorëzojnë armët dhe të shpërbëhen menjëherë, në mënyrë që të gjendet një zgjidhje pa rrjedhje të mëtejshme gjaku, pas ultimatumit të Damaskut që u dha atyre katër ditë për t’u integruar në strukturat e shtetit qendror.
Gjatë një fjalimi për ligjvënësit e Partisë AK në Parlament, Erdogan shprehu mirëpritjen për marrëveshjen e armëpushimit midis Damaskut dhe Forcave Demokratike Siriane të udhëhequra nga kurdët, pas përparimeve të shpejta të qeverisë siriane në ditët e fundit.
Presidenti turk theksoi se organizata terroriste, e cila është e kufizuar në disa zona në veri të Sirisë, nuk mund të vazhdojë ekzistencën e saj, dhe çdo provokim në këtë moment do të ishte vetëvrasje. Ai gjithashtu u bëri thirrje qytetarëve kurdë që të mos bien pre e propagandës dhe provokimeve, duke vepruar me qetësi, arsyetim dhe maturi.
Erdogan tha se falë përpjekjeve të Turqisë, të drejtat e qytetarëve kurdë në Siri po njihen nga administrata e re, dhe shpresoi që integrimi i plotë i forcave kurde do të hapë një epokë të re në rajon.
Ai shtoi se gjatë një bisede telefonike me Presidentin amerikan, Donald Trump, u diskutuan çështje kyçe për sigurinë e Sirisë, përfshirë luftën kundër militantëve të Shtetit Islamik, duke theksuar se qytetarët e zonave të mbetura nën kontrollin e organizatës terroriste do të fitojnë sa më shpejt lirinë e tyre dhe do të ndërtohet një Siri e bashkuar dhe e sigurt për të gjithë./mxh