Një valë e madhe mbështetjeje ka përfshirë familjen e Eric Dane, aktorit të njohur të Grey’s Anatomy, i cili ndërroi jetë të enjten në moshën 53-vjeçare, duke lënë pas dy vajza adoleshente. Një fushatë bamirësie online ka mbledhur më shumë se 275,000 dollarë, duke shkuar drejt objektivit prej 500,000 dollarësh për të siguruar të ardhmen e vajzave të tij.
Yjet e Hollivudit dhe miq të ngushtë të Dane janë angazhuar me dhurime të shuma të mëdha: Sam Levinson, krijuesi i Euphoria, dhe bashkëshortja e tij dhuruan 27,000 dollarë, ndërsa krijuesi i Glee-së, Brad Falchuk, kontribuoi me 10,000 dollarë. Edhe modelja Hailey Bieber kontribuoi me plot 20.000 dollarë.
Fushata e GoFundMe përshkruan luftën e Dane me sëmundjen ALS (Lou Gehrig), duke vënë në pah angazhimin e tij si avokat i komunitetit të pacientëve me këtë gjendje. “Edhe me përkeqësimin e shëndetit, Eric mbeti i përkushtuar për të ndihmuar të tjerët që përballen me të njëjtën sëmundje shkatërruese,” shkruhet në faqen e bamirësisë.
Vdekja e aktorit u konfirmua të premten, me Dane të rrethuar nga bashkëshortja e tij, Rebecca Gayheart, vajzat Billie dhe Georgia, dhe miq të ngushtë. Shumë kolegë dhe yje kanë ndarë ngushëllimet dhe kujtimet e tyre, përfshirë Patrick Dempsey, Ashton Kutcher, Alyssa Milano dhe Shonda Rhimes.
Eric Dane u bë i njohur si Dr. Mark ‘McSteamy’ Sloan në Grey’s Anatomy dhe më pas luajti në Euphoria rolin e Cal Jacobs. Ai gjithashtu ka pasur role në filma të njohur si Marley & Me, Burlesque dhe Valentine’s Day, si dhe në serialin post-apokaliptik The Last Ship.
Bashkëshortja e Dane, Gayheart, ndau fillimin e fushatës me një foto në Instagram, duke shkruar: “Faleminderit të gjithëve,” duke treguar mirënjohjen e saj për mbështetjen e pafund të komunitetit dhe miqve të aktorit./mxh