Tensionet ushtarake mes Uashingtonit dhe Teheranit kanë marrë një tjetër rrjedhë të rrezikshme mëngjesin e së shtunës, pas raportimeve nga mediat iraniane se një anije cisternë e naftës është goditur nga forcat amerikane në afërsi të Ishullit Kharg, pranë Ngushticës së Hormuzit.
Sipas të dhënave të para, në anije janë dëgjuar shpërthime të njëpasnjëshme që kanë detyruar evakuimin e menjëhershëm të ekuipazhit, ndërsa deri më tani nuk raportohet për viktima. Incidenti vjen vetëm një ditë pasi Irani lëshoi raketa kundër anijeve në Ngushticën e Hormuzit, duke nxitur një reagim të menjëhershëm ushtarak.
Sulmi i fundit prek drejtpërdrejt një nga pikat më ushtarake dhe ekonomike më strategjike të rajonit. Ishulli Kharg përpunon rreth 90% të eksporteve të naftës bruto të Iranit, çka e bën çdo incident në këtë zonë një kërcënim të drejtpërdrejtë për furnizimin dhe çmimet globale të energjisë.
Përplasjet ushtarake janë intensifikuar që nga fillimi i javës, kur Komanda Qendrore e SHBA-së (CENTCOM) ndërmori disa valë sulmesh ndaj radarëve, mbrojtjes ajrore dhe kapaciteteve detare të Trupave të Rojës Revolucionare (IRGC), si përgjigje ndaj vendosjes së minave dhe sulmeve ndaj anijeve tregtare. Nga ana e saj, IRGC ka premtuar hakmarrje, duke goditur disa baza amerikane në Lindjen e Mesme.
Deri më tani, as zyrtarët e Uashingtonit dhe as ata të Teheranit nuk kanë dalë me një deklaratë zyrtare për ngjarjen e fundit, ndërsa komuniteti ndërkombëtar po ndjek me shqetësim mundësinë e bllokimit të plotë të rrugëve detare të naftës.