Last Updated on 20/04/2026 by EL
Miliarderi Elon Musk dhe Linda Yaccarino janë thirrur nga prokurorët francezë për atë që Le Monde e përshkroi si “marrje në pyetje vullnetare”, si pjesë e hetimit të nisur nga hetuesit parizienë për abuzim të dyshuar në platformën e mediave sociale X (e njohur më parë si Twitter).
Autoritetet franceze lëshuan një thirrje për Musk në shkurt si pjesë e një hetimi, të nisur në janar 2025, mbi akuzat se algoritmi i X u përdor për të ndërhyrë në politikën franceze. Hetimi u zgjerua më vonë duke përfshirë përhapjen e materialeve seksuale me fëmijë dhe përmbajtjes së rreme.
Prokurorët francezë synojnë të verifikojnë nëse sistemet e moderimit të platformës dhe teknologjitë e inteligjencës artificiale nuk shkelin ligjet kombëtare për mbrojtjen e të miturve dhe dinjitetin personal.
Sidoqoftë, prokurorët kanë deklaruar se mungesa e mundshme e pronarit të rrjetit social “nuk do të pengojë vazhdimin e hetimit”.
Çfarë po heton prokuroria franceze
Hetuesit francezë hapën një hetim ndaj X në janar 2025. Sipas hetuesve, kishte pasur abuzime në rrjetin social dhe çështja ka implikuar pronarin Elon Musk dhe ish-drejtoreshën ekzekutive Linda Yaccarino. Të dy po hetohen “në cilësinë e tyre si menaxherë de facto dhe de jure të platformës X në kohën e ngjarjeve”, shpjegoi prokurorja e Parisit Laure Beccuau.
Akuzat bazohen në bashkëpunimin e dyshuar në shpërndarjen e pornografisë së fëmijëve dhe përdorimin e Grok, modelit të inteligjencës artificiale të X, për të gjeneruar deepfakes seksuale, d.m.th., imazhe eksplicite realiste të krijuara pa pëlqimin e përdoruesve. Në fillim të shkurtit të këtij viti, u krye një kontroll në zyrat e platformës, e cila e denoncoi inspektimin si një “akt gjyqësor abuziv” të motivuar nga “arsye politike”./et