Presidenti amerikan Donald Trump, në një deklaratë lidhur me ofensivën ushtarake në Iran u shpreh se SHBA-të ishin afër përfundimit të luftës në Iran, duke shtuar se objektivat kryesore strategjike të Uashingtonit në luftë po i afroheshin përfundimit.
“Jam i kënaqur të them se këto objektiva strategjike thelbësore po i afrohen përfundimit”, tha Trump. Ai shtoi se SHBA-të do të vazhdojnë të godasin objektiva në Republikën Islamike gjatë dy deri në tre javëve të ardhshme.
“Ne do ta përfundojmë punën, dhe do ta përfundojmë shumë shpejt. Po i afrohemi shumë”, tha Trump.
Trump foli gjithashtu edhe për Ngushticën e Hormuzit, duke thënë se SHBA-të pothuajse nuk importojnë naftë përmes Ngushticës së Hormuzit dhe nuk do të marrin asnjë në të ardhmen.
“Nuk kemi nevojë për të. Nuk kemi pasur nevojë për të dhe nuk kemi nevojë për të. E kemi mundur dhe e kemi shkatërruar plotësisht Iranin. Dhe vendet e botës që marrin naftë përmes Ngushticës së Hormuzit duhet të kujdesen për atë kalim. Ata duhet ta vlerësojnë atë. Ata duhet ta kapin dhe ta vlerësojnë atë”, tha Trump.
Më tej ai foli për krizën ekonomike të shkaktuar nga lufta ku tha se Irani duhet fajësuar për rritjen e çmimeve të naftës.
“Rritja është tërësisht rezultat i sulmeve terroriste të çmendura nga regjimi iranian kundër cisternave komerciale të naftës dhe vendeve fqinje që nuk kanë të bëjnë fare me konfliktin”, u shpreh presidenti amerikan.
Rritja e çmimeve të karburantit gjatë gjithë konfliktit ka shkaktuar vështirësi edhe në vende të tjera , për shembull, në Filipine, e cila u bë vendi i parë që shpalli një emergjencë kombëtare energjitike javën e kaluar. Komisioni Evropian mori në konsideratë edhe presionin mbi burimet e energjisë , duke u thënë njerëzve një ditë më parë të punonin nga shtëpia ose të fluturonin më pak, me shefen e energjisë të BE-së që u bëri thirrje shteteve anëtare të dyfishojnë energjinë e rinovueshme. /kb