Last Updated on 09/06/2026 by Kesjana
/F.CÇdo ditë kalojmë mesatarisht rreth katër orë e gjysmë me telefonin në dorë, duke e kontrolluar atë afërsisht çdo nëntë minuta. Po sikur këto ndërveprime të shpeshta të shërbenin edhe për të monitoruar shëndetin tonë? Një teknologji e re e publikuar në revistën Nature përdor Inteligjencën Artificiale për të matur në mënyrë pasive ritmin e zemrës sa herë që përdoruesi zhbllokon telefonin. Sistemi mund të zgjerojë ndjeshëm mundësitë e parandalimit të sëmundjeve kardiovaskulare, veçanërisht për njerëzit që nuk përdorin pajisje të veshshme si orët inteligjente. Teknologjia është zhvilluar nga studiues të Google Research në Massachusetts dhe bazohet në video të shkurtra prej tetë sekondash të regjistruara nga kamera e përparme e telefonit sa herë që pajisja zhbllokohet. Këto video analizohen nga algoritme të Inteligjencës Artificiale për të zbuluar ndryshimet shumë të vogla të ngjyrës së lëkurës që shkaktohen nga qarkullimi i gjakut. Me çdo rrahje të zemrës, gjaku i oksigjenuar kalon në enët e gjakut të fytyrës dhe ndryshon lehtësisht sasinë e dritës që reflektohet nga lëkura. Këto ndryshime janë të padukshme për syrin e njeriut, por mund të identifikohen nga kamera e smartfonit.
Saktësi e krahasueshme me pajisjet profesionale
Teknologjia përdor një metodë të quajtur fotopletizmografi (PPG), e cila mat ndryshimet e volumit të gjakut në inde përmes dritës. Ndryshe nga pajisjet tradicionale që kërkojnë kontakt fizik me trupin, si sensorët në gisht ose orët inteligjente, ky sistem funksionon pa kontakt të drejtpërdrejtë. Për të trajnuar algoritmin, shkencëtarët përdorën më shumë se 192 mijë video nga 485 pjesëmarrës me nuanca të ndryshme të lëkurës. Më pas teknologjia u testua te 211 persona në laborator dhe në kushte reale. Rezultatet treguan se matjet e ritmit të zemrës ishin të sakta në kushte të ndryshme ndriçimi dhe për të gjitha nuancat e lëkurës. Kur u krahasuan me elektrokardiogramet (EKG), gabimi mesatar rezultoi më pak se 10%, duke përmbushur standardet e industrisë. Duke kombinuar matjet e kryera gjatë gjithë ditës, studiuesit arritën të përcaktojnë ritmin e zemrës në pushim me një saktësi të ngjashme me atë të rripave profesionalë të monitorimit kardiak. Megjithatë, para se teknologjia të përdoret gjerësisht, duhet të adresohen çështjet që lidhen me privatësinë, pasi sistemi kërkon regjistrimin e vazhdueshëm të videove të fytyrës së përdoruesit. Nëse këto sfida kapërcehen dhe rezultatet konfirmohen në studime më të mëdha, miliarda njerëz në mbarë botën mund të kenë në xhepin e tyre një mjet të ri dhe të fuqishëm për monitorimin e shëndetit të zemrës./F.C