Pak pasi ushtria e Iranit njoftoi se po rivendoste sërish kufizimet e kalimit në Ngushticën e Hormuzit, duke frenuar entuaziasmin që pasoi njoftimet e hapjes së kanalit të rëndësishëm ujor, ka pasur të shtëna sipas CNN ndaj një anijeje cisternë që po lundronte aty.
Ishte Organizata e Trafikut Detar të Mbretërisë së Bashkuar (UKMTO) ajo që njoftoi se forcat e Gardës Revolucionare Iraniane kanë qëlluar mbi cisternën, dhe incidentin ia ka raportuar vetë kapiteni i saj, i cili tha se “2 anije luftarake të IRGC-së”, i ishin afruar mjetit lundrues rreth 20 milje detare larg brigjeve të Omanit. Kapiteni pretendon se nuk ka pasur asnjë paralajmërim në radio përpara se anija të qëllohej. Cisterna vetë dhe ekuipazhi i saj megjithatë janë të sigurt. Ngjarja ndodhi në kohën kur Irani vendosi rikthimin e bllokadës, në përgjigje të faktit që Shtetet e Bashkuara kanë vazhduar të mos lejonin kalimin e anijeve të nisura nga portet iraniane, dhe kishin kthyer mbrapsht 21 prej tyre.
“Për sa kohë që kalimi i anijeve nga origjina iraniane drejt destinacionit iranian mbetet nën kërcënim, statusi i Sundimit të Hormuzit do të vijojë të jetë edhe ai në gjendjen e tij të mëparshme,” thuhet në një postim në X të marinës së Gardës Revolucionare Islamike (IRGC). Irani kishte njoftuar të premten se do të hiqte përkohësisht bllokadën e Ngushticës së Hormuzit. Ministri i Jashtëm iranian, Abbas Araghtschi, deklaroi se anijet tregtare mund të kalonin përmes ngushticës gjatë pjesës së mbetur të armëpushimit. Megjithatë, presidenti amerikan Donald Trump vazhdon pa asnjë zbutje bllokadën detare të SHBA‑së, të paktën derisa në negociata të arrihet një marrëveshje me Iranin. “Bllokada detare mbetet, për sa i përket Iranit, plotësisht në fuqi, derisa negociatat tona me Iranin të përfundojnë njëqind për qind,” theksoi ai.