Last Updated on 16/07/2026 by Anisa
Seanca plenare e kësaj të enjteje në Kuvend u zhvillua pa praninë e deputetëve të Partisë Demokratike dhe Partisë së Lirisë, të cilët vijojnë bojkotin parlamentar. Mungesa e opozitës solli anulimin e interpelancës së planifikuar mes deputetes demokrate Jorida Tabaku dhe ministrit të Financave, ndërsa diskutimet u dominuan nga deputetët e mazhorancës.
Gjatë zhvillimeve të seancës, kreu i grupit parlamentar socialist, Taulant Balla, u ka kërkuar deputetëve të Partisë Socialiste që të mos largohen nga Tirana edhe pas përfundimit të sesionit parlamentar. Sipas burimeve, nuk përjashtohet mundësia e zhvillimit të një seance të posaçme më 27 korrik, datë që nuk ishte parashikuar në kalendarin zyrtar të punimeve të Kuvendit.
Kjo porosi ka ngritur pikëpyetje brenda mazhorancës për arsyet e një vendimi të tillë. Një prej mundësive që përmendet lidhet me shqyrtimin e projektligjeve të rëndësishme në kuadër të procesit të integrimit europian dhe negociatave të Shqipërisë me Bashkimin Europian.
Ndërkohë, qarkullojnë edhe zëra, ende të pakonfirmuar, se një seancë e tillë mund të shfrytëzohet për ndryshime të mundshme në kabinetin qeveritar. Këto hamendësime lidhen me situatën politike dhe protestat e fundit, por deri tani nuk ka një konfirmim zyrtar nga qeveria apo mazhoranca.
“Deputetët e mazhorancës janë porositur që të mos largohen, pasi potencialisht mund të ketë një seancë tjetër të hënën e 27 korrikut. Kjo nuk ishte pjesë e kalendarit të punimeve të Kuvendit dhe brenda mazhorancës ka kuriozitet se për çfarë arsye është kërkuar që deputetët të qëndrojnë në Tiranë”, u raportua gjatë zhvillimeve të ditës.
Ndërkohë, gjatë seancës plenare, e cila u përqendrua kryesisht në diskutimet e deputetëve socialistë, Taulant Balla kërkoi shqyrtimin me procedurë të përshpejtuar të ndryshimeve në ligjin për turizmin.
Ndryshimet e propozuara parashikojnë pezullimin e punimeve të ndërtimit gjatë sezonit turistik në zonat turistike, me qëllim shmangien e zhurmave dhe shqetësimeve pranë strukturave akomoduese. Sipas Ballës, kjo masë synon të përmirësojë cilësinë e përvojës së pushuesve dhe të rrisë standardet e turizmit në vend.
Nga ana tjetër, deputeti socialist Erion Braçe ngriti shqetësime për marrëdhëniet mes fermerëve dhe grumbulluesve të produkteve bujqësore. Ai kërkoi ndërhyrje të shpejtë për mbrojtjen e prodhuesve vendas dhe garantimin e një raporti më të drejtë mes fermerëve dhe tregut.
Seanca e sotme u zhvillua në një klimë politike të tensionuar, me opozitën jashtë sallës së Kuvendit dhe me pikëpyetje mbi zhvillimet e mundshme parlamentare në ditët në vijim./ad