Pesëmbëdhjetë restorante në Sardenjë, Itali do të marrin pjesë në një nismë që synon të kufizojë përdorimin e telefonave dhe pajisjeve të tjera elektronike gjatë vakteve familjare, për t’u dhënë prindërve dhe fëmijëve më shumë mundësi të komunikojnë me njëri-tjetrin.
Nisma quhet A tavola senza schermi (në tavolinë pa ekrane) dhe do të testohet për një muaj, duke nisur nga fillimi i nëntorit.
Si do të funksionojë?
Familjeve që zgjedhin të hanë në një nga restorantet pjesëmarrëse do t’u kërkohet t’i lënë mënjanë telefonat dhe pajisjet elektronike gjatë vaktit. Por ideja nuk është që thjesht t’u hiqet telefoni nga duart fëmijëve. Në vend të tij, stafi do t’u ofrojë familjeve një paketë me lojëra dhe vizatime, të krijuar nga Federata Italiane e Pediatërve.
Aktivitetet janë menduar për të nxitur biseda mes prindërve dhe fëmijëve, për shembull, duke i inkurajuar të bisedojnë ose të luajnë së bashku gjatë kohës që presin ushqimin.
Paketa përfshin gjithashtu një broshurë informuese për rreziqet e ekspozimit të tepruar ndaj ekraneve dhe këshilla për menaxhimin e përdorimit të rrjeteve sociale në shtëpi.
Pse u ndërmor kjo nismë?
Projekti është propozuar nga Anna Cau, përgjegjëse për mbrojtjen e të drejtave të fëmijëve në Sardenjë. Sipas saj, zgjidhja nuk qëndron vetëm te kufizimet apo te vendosja e gjithë përgjegjësisë mbi prindërit. Edhe mjediset ku familjet kalojnë kohë duhet të krijojnë mundësi për ndërveprim.
Nisma është zhvilluar në bashkëpunim me përfaqësuesit lokalë të Fipe-Confcommercio, shoqatës italiane që përfaqëson bizneset e gastronomisë, turizmit dhe argëtimit.
Emanuele Frongia, presidenti i federatës në Sardenjë, thotë se restorantet kanë një rol të rëndësishëm në krijimin e momenteve familjare. Megjithatë, ai vëren se gjithnjë e më shpesh bisedat gjatë vakteve zëvendësohen nga heshtja, ndërsa të gjithë shohin ekranet e tyre. Në shumë raste, edhe fëmijëve u jepet një telefon vetëm që të qëndrojnë të qetë.
Për momentin, projekti do të zbatohet në 15 restorante që kanë pranuar vullnetarisht të marrin pjesë, por synimi është që më vonë nisma të zgjerohet.