Një pikturë e realizuar në vitin 1960 nga artistja e njohur japoneze Yayoi Kusama është shitur për 14.7 milionë dollarë në një ankand të organizuar nga shtëpia prestigjioze Sotheby’s në Nju Jork, duke vendosur një rekord të ri për veprat e saj.
Vepra me titull “Nr. 3P.B.” u shit gjatë ankandit të artit modern dhe bashkëkohor, ndërsa çmimi prej 14.7 milionë dollarësh përfshin edhe komisionin e ankandit. Shitja u realizua pas një gare të fortë mes blerësve, e cila zgjati katër minuta dhe përfshiu gjithsej 10 oferta.
Piktura, me një lartësi prej më shumë se 1.5 metrash, është pjesë e serisë së famshme “Infinity Net”, e cila konsiderohet ndër krijimet më të rëndësishme të artistes japoneze. Vepra karakterizohet nga një sfond i errët, i mbuluar plotësisht me mijëra goditje të vogla dhe të dendura peneli në ngjyrë të kuqe, të cilat krijojnë forma të përsëritura dhe një efekt vizual të veçantë.
E krijuar në një periudhë të hershme të karrierës së Kusamës, piktura përfaqëson një nga shembujt domethënës të stilit të saj artistik, të ndërtuar mbi përsëritjen, vazhdimësinë dhe motivet abstrakte.
Setting a new auction record for the late artist, Yayoi Kusama’s ‘No. 3P.B.’, from her acclaimed Infinity Nets series, sold for $15M in the Sotheby’s New York auction room tonight. https://t.co/PsU1YKYHPH
— Sotheby’s (@Sothebys) November 17, 2026
Rëndësia e veprës u vlerësua që në fillimet e saj. Në vitin 1961, ajo u përfshi në ekspozitën vjetore të pikturës së Muzeut Whitney, duke fituar një vend të rëndësishëm në skenën e artit bashkëkohor.
Seria “Infinity Net” ka ndikuar në zhvillimin e artit modern dhe lidhet ngushtë me lëvizjet e Minimalizmit dhe Post-Minimalizmit.
Shitja rekord në Sotheby’s konfirmon edhe një herë interesin e madh të koleksionistëve për krijimtarinë e Yayoi Kusamës.
