Last Updated on 17/10/2026 by EL
Protestat kundër rritjes së kostos së jetesës dhe vështirësive për të përballuar çmimet e banesave po përhapen në Europë. Në Portugali, sindikatat dhe organizatat për të drejtat e strehimit kanë organizuar demonstrata në disa qytete të vendit, ndërsa në Francë protestat e së shtunës u shoqëruan me përplasje mes demonstruesve dhe policisë së trazirave.
Konfederata e Sindikatave CGTP ka bërë thirrje për protesta nën sloganin: “Paga më të larta, pensione më të mira dhe shërbime publike. Kundër rritjes së kostos së jetesës. Një kurs i ri për Portugalinë!”.
Tubimet janë planifikuar në Lisbonë, Porto dhe Coimbra, në një kohë kur rritja e çmimeve, shtrenjtimi i karburanteve dhe mungesa e banesave të përballueshme po rëndojnë buxhetet familjare në shumë vende europiane.
“Përballë rritjes së kostos së jetesës, çmimeve të banesave dhe karburanteve, edhe një shportë bazë ushqimore ka arritur në nivele të tepruara”, deklaroi një përfaqësues i CGTP-së për televizionin SICN në Coimbra, të shtunën në mëngjes.
Në Porto, marshimi nisi rreth orës 10:30 nga sheshi Praça da Batalha dhe pritet të përfundojë në Praça D. João I, ku gjatë gjithë javës janë zhvilluar protesta kundër krizës së strehimit.
Pedro Manuel, një nga organizatorët e protestës në këtë qytet, tha se nisma mbështetet nga qytetarët dhe nuk është e lidhur institucionalisht me asnjë parti politike.
“Ne po vazhdojmë me asamblenë tonë popullore, me mbështetjen e qytetarëve të zakonshëm, të pavarur nga çdo parti. Njerëzit vijnë nga grupe të ndryshme, por ne nuk jemi të lidhur institucionalisht me asnjërin prej tyre. Kjo është një thirrje kundër abuzimit me pushtetin dhe një mënyrë për të thënë se kjo krizë duhet të marrë fund”, u shpreh ai.
Edhe përfaqësuesi i Bllokut të Majtë, José Manuel Pureza, theksoi se kërkesa kryesore e protestuesve është garantimi i së drejtës për strehim.
“Ajo që njerëzit kërkojnë të diskutohet është e drejta e çdo personi për të pasur një banesë”, deklaroi ai për Associated Press.
Sipas Purezës, qytetarët po përballen me rritje të vazhdueshme të qirave dhe me vështirësi gjithnjë e më të mëdha për të përballuar këstet e kredive për banesat. Ai nënvizoi se protestat janë zhvilluar në mënyrë paqësore.
Në Coimbra, tubimi nisi pranë kompleksit Portugal dos Pequenitos dhe pritet të përfundojë në sheshin Praça 8 de Maio, përpara bashkisë së qytetit.
Ndërkohë, në kryeqytetin Lisbonë, mijëra qytetarë pritet t’i bashkohen marshimit që nis në orën 14:30 nga zona e Cais do Sodré dhe përfundon në sheshin Rossio. Kryebashkiaku i Lisbonës e ka cilësuar kauzën të drejtë, por ka theksuar se protestat duhet të zhvillohen në përputhje me ligjin.
Sekretari i përgjithshëm i CGTP-së, Tiago Oliveira, deklaroi për agjencinë e lajmeve Lusa se demonstratat janë një reagim ndaj rritjes së fortë të çmimeve të banesave dhe kostos së përgjithshme të jetesës.
Ai paralajmëroi gjithashtu për përkeqësimin e shërbimeve publike dhe tha se protestat përbëjnë një mundësi për qytetarët që të kundërshtojnë politikat e qeverisë.
Demonstratat në Portugali zhvillohen në një moment kur pakënaqësia për çmimet, strehimin dhe fuqinë blerëse po mobilizon qytetarë në vende të ndryshme të Europës. Në Francë, protestat e së shtunës u përshkallëzuan në përplasje mes demonstruesve dhe policisë së trazirave.