Policia e Vjenës pret që protestat kundër pjesëmarrjes së Izraelit në Festivalin e Këngës në Eurovision të përfshijnë bllokada dhe përpjekje për ndërprerje. Policia e ka cilësuar konkursin në kryeqytetin austriak një nga ngjarjet më të mëdha të sigurisë me të cilat janë përballur.
Një festë e muzikës pop dhe muzikës “high camp”, konkursi po zhvillohet në rrethana veçanërisht të tensionuara këtë vit, pasi pesë transmetues kombëtarë, përfshirë televizionin spanjoll RTVE dhe atë irlandez RTE, po bojkotojnë për shkak të sjelljes së Izraelit në luftën në Gaza, e cila u nis si hakmarrje për sulmet e tetorit 2023 ndaj Izraelit nga Hamasi.
Lufta e Iranit tani e ka përkeqësuar atë tension. Për javën e ardhshme janë regjistruar disa demonstrata, kryesisht kundër, por edhe në favor të pjesëmarrjes së Izraelit, me pjesëmarrje që vlerësohet të jetë deri në 3,000 persona.
“Ne presim që në fakt të ketë bllokada dhe veprime shqetësuese, veçanërisht ditën e finales, qoftë përmes tubimeve të autorizuara apo të paautorizuara”, tha në një konferencë për shtyp Xenia Zauner, një zyrtare e lartë e policisë që do të mbikëqyrë operacionin e sigurisë.
Nata e finales, të premten më 15 maj, është gjithashtu Dita e Nakbës kur palestinezët përkujtojnë humbjen e tokës së tyre pas luftës së vitit 1948 në lindjen e shtetit të Izraelit. Fjala “nakba” do të thotë “katastrofë”.
Zauner tha se ajo ditë ka rëndësi të madhe emocionale për lëvizjen pro-Palestine. Policia po përgatitet për një gamë të gjerë kërcënimesh./et