Amazon po investon në ndërtimin e një centrali energjetik pranë një qendre të re të dhënash në Pecos County, Teksas.
Sipas raportimit të The New York Times, centrali mund të shndërrohet në burimin më të madh të ndotjes klimatike në Shtetet e Bashkuara.
Impianti do të përdorë gaz natyror dhe është autorizuar të çlirojë deri në 33 milionë tonë dioksid karboni në vit, më shumë se çdo central tjetër energjetik në SHBA.
Një zëdhënës i Amazon konfirmoi se qendra e të dhënave do të furnizohet nga kapacitete të reja energjetike të ndërtuara në vend.
Sipas kompanisë, kjo zgjidhje nuk do të rrisë kostot e energjisë elektrike për familjet në Teksas. Qendrat e të dhënave po përballen me kundërshtim politik gjithnjë e më të madh, mes të tjerash edhe për ndikimin që kanë në faturat e energjisë.
Zgjerimi i inteligjencës artificiale tashmë ka ndikuar te gjurma mjedisore e Amazon. Emetimet e karbonit të kompanisë u rritën me 16% vitin e kaluar, duke e larguar atë nga objektivi për eliminimin e emetimeve deri në vitin 2040.
Situata mund të përkeqësohet, ndërsa Amazon dhe kompani të tjera teknologjike mbështesin ndërtimin e centraleve të mëdha me gaz natyror për të furnizuar qendrat e të dhënave, të cilat konsumojnë sasi të mëdha energjie.
Amazon deklaroi se, megjithëse bota ka ndryshuar që nga krijimi i angazhimit të saj klimatik, objektivi i kompanisë mbetet i pandryshuar./ad