Videot dhe fotografitë që shohim përpara nisjes mund ta bëjnë një destinacion të duket i njohur, edhe kur e vizitojmë për herë të parë. Informacioni na ndihmon të organizohemi, por kërkimi i tepruar mund të zbehë kënaqësinë e zbulimit.
Sipas një sondazhi të Hint App me 10,684 të rritur nga disa rajone të botës, 68% e udhëtarëve kishin përjetuar këtë ndjesi familjariteti. Ndërkohë, 74% deklaruan se i hulumtonin destinacionet aq hollësisht, sa mbeteshin pak surpriza pas mbërritjes; 64% njihnin monumente dhe pika panoramike nga rrjetet sociale.
Artikulli sugjeron të kufizojmë ekspozimin paraprak ndaj pamjeve dhe të lëmë hapësirë për zbulime spontane. Guidat e shtypura ofrojnë orientim pa treguar çdo detaj. Bisedat me banorët, stafin e hotelit dhe udhëtarë të tjerë mund të sjellin rekomandime që nuk i kemi hasur në ekran.
Edhe shëtitjet pa një program të ngjeshur krijojnë mundësi për të zbuluar rastësisht një kafene, restorant apo muze. Ideja është të përdorim informacionin për t’u orientuar, duke i lënë vend përvojës që na pret atje./ EURONEWS TRAVEL-ad