Zëdhënësja e Ministrisë së Jashtme ruse, Maria Zakharova, deklaroi se Britania duhet të bëjë publike se çfarë po bënte në të vërtetë një ushtar britanik i vrarë në Ukrainë të martën, duke akuzuar Londrën se po ndihmonte Kievin të kryente “akta terrorizmi”.
Ministria e Mbrojtjes e Britanisë njoftoi të martën se ushtari, Lance Corporal George Hooley, humbi jetën në Ukrainë ndërsa po vëzhgonte forcat ukrainase që testonin një kapacitet të ri mbrojtës larg vijës së frontit.
Zakharova tha se qeveria britanike nuk duhet të mashtrojë qytetarët e saj duke pretenduar se ushtarët britanikë të dërguar në Ukrainë ishin thjesht këshilltarë ose instruktorë, duke akuzuar forcat britanike se ndihmonin Kievin “të kryente sulme terroriste dhe detyra ekstremiste” nën urdhër të drejtpërdrejtë të Londrës.
Ajo shtoi se Rusia do të konsideronte çdo kontingjent ushtarak të huaj në Ukrainë si një objektiv legjitim, por nuk ofroi prova për të mbështetur akuzat e saj mbi përfshirjen më të gjerë të Mbretërisë së Bashkuar.
Qeveria britanike, një nga mbështetësit më të vendosur të Ukrainës, nuk ka konfirmuar kurrë numrin e saktë të personelit ushtarak të pranishëm në vend, por BBC ka raportuar se një kontingjent i vogël po mbështet forcat ukrainase dhe siguron mbrojtjen e stafit diplomatik./mxh