Rusia dhe Ukraina kanë rënë dakord për një armëpushim të përkohshëm në qytetin Oleshki, në jug të Ukrainës, i cili ndodhet nën kontrollin rus. Marrëveshja e rrallë lokale, e arritur me përfshirjen e Zonjës së Parë të SHBA-së, Melania Trump, synon dërgimin e ndihmave humanitare dhe përgatitjen e evakuimit të sigurt të civilëve të bllokuar në zonën e shkatërruar nga luftimet.
Armëpushimi hyri në fuqi në orën 03:00 të së martës. Të dyja palët kanë konfirmuar se po respektojnë angazhimet e marra. Lajmi u bë i ditur përmes deklaratave në Telegram nga përfaqësues të institucioneve ukrainase dhe ruse, ndërsa marrëveshjen e konfirmoi edhe kreu i zyrës së presidencës ukrainase, Kyrylo Budanov.
Pavarësisht armëpushimit në Oleshki, luftimet vijojnë në pjesë të tjera të frontit. Gjatë natës, Rusia lëshoi një valë raketash balistike drejt Kievit, duke goditur edhe një ndërtesë universitare. Sulmet shkaktuan gjithashtu probleme të mëdha në qarkullimin rrugor dhe në funksionimin e metrosë pranë urës strategjike Pivdennyi, mbi lumin Dniepër.
Marrëveshja synon të krijojë një korridor për dërgimin e furnizimeve jetike dhe largimin e civilëve që kanë mbetur të bllokuar pas luftimeve të zgjatura. Megjithatë, situata e sigurisë në Ukrainë mbetet e tensionuar, ndërsa armëpushimi në këtë zonë përbën një marrëveshje të kufizuar dhe jo një ndalim të përgjithshëm të luftimeve./ad