Sekretari i Thesarit të Shteteve të Bashkuara, Scott Bessent, deklaroi se tregu global i naftës mbetet i furnizuar mirë, pavarësisht tensioneve në Lindjen e Mesme.
Në një intervistë për Fox News, ai theksoi se gjithnjë e më shumë anije po kalojnë çdo ditë përmes Ngushticës së Hormuzit, pasi disa vende kanë arritur marrëveshje të përkohshme me Iranin.
Megjithatë, zyrtari amerikan paralajmëroi se në afat më të gjatë, Shtetet e Bashkuara synojnë të rikthejnë kontrollin mbi këtë rrugë jetike detare.
Sipas tij, liria e lundrimit do të garantohet përmes shoqërimit të anijeve nga forcat amerikane ose nga një mision shumëkombësh.
Deklaratat e tij vijnë në një kohë kur presidenti amerikan, Donald Trump, ka paralajmëruar Iranin për rihapjen e menjëhershme të kësaj ngushtice strategjike, përndryshe duke kërcënuar me sulme ndaj infrastrukturës energjetike.
Ngushtica e Hormuzit mbetet një nga arteriet më të rëndësishme të tregtisë globale, pasi përmes saj kalon një pjesë e konsiderueshme e furnizimeve botërore me naftë dhe gaz të lëngshëm./mxh