Aktorja Selma Blair është arrestuar në New York pas një incidenti të raportuar në bordin e një avioni të Delta Air Lines, që po udhëtonte nga Los Angeles drejt aeroportit John F. Kennedy. Sipas raportimeve, 54-vjeçarja dyshohet se goditi me grusht një stjuardesë, kafshoi një tjetër dhe tentoi të hapte derën e avionit gjatë fluturimit. Pas uljes, ajo u përball gjithashtu me akuza për sulm ndaj një oficereje policie dhe një infermiereje.
Ngjarja ndodhi të dielën në mbrëmje, më 11 tetor, rreth orës 23:00, kur avioni i linjës Delta, fluturimi 938, mbërriti në aeroportin JFK. Autoritetet ndërhynë pas një telefonate për një pasagjere që dyshohej se po shfaqte sjellje fizike agresive. Sipas raportimeve, dy pjesëtare të ekuipazhit pësuan lëndime dhe njëra prej tyre u dërgua në spital për vlerësim mjekësor.
Pas uljes, Blair u mor në paraburgim dhe u dërgua në Jamaica Hospital Medical Center për t’iu nënshtruar një vlerësimi mjekësor. Sipas dokumenteve të gjykatës, gjatë transportimit drejt spitalit, aktorja dyshohet se goditi vazhdimisht me shqelma një oficere policie në fytyrë, qafë dhe gjoks, duke i shkaktuar dhimbje dhe ënjtje. Një infermiere raportoi gjithashtu se Blair e goditi me shqelma në gjoks gjatë qëndrimit në spital.
Çfarë thotë përfaqësuesi i aktores?
Përfaqësuesi i Selma Blair deklaroi se aktorja kishte përjetuar një urgjencë mjekësore, e cila çoi në sjelljen për të cilën akuzohet. Sipas deklaratës së tij, pas uljes ajo mori menjëherë ndihmë mjekësore dhe ndodhej në gjendje të qëndrueshme. Nuk janë bërë publike hollësi të mëtejshme për natyrën e urgjencës mjekësore.
Ndërkohë, kompania Delta Air Lines deklaroi se ka tolerancë zero ndaj sjelljeve të pakontrolluara ose të paligjshme, duke theksuar se siguria e pasagjerëve dhe ekuipazhit mbetet përparësia e saj.
Nuk është hera e parë që përfshihet në një incident gjatë fluturimit
Në vitin 2016, Selma Blair u përfshi në një tjetër incident gjatë një fluturimi nga Kankuni, Meksikë, drejt Los Angeles. Në atë kohë, ajo u nxor nga avioni me barelë pasi kishte shfaqur sjellje shqetësuese. Më vonë, aktorja kërkoi falje publikisht dhe shpjegoi se kishte kombinuar alkoolin me ilaçe, gjë që, sipas saj, i kishte shkaktuar humbje të vetëdijes dhe sjellje për të cilat ishte penduar.
Blair njihet për rolet në filmat Cruel Intentions, Legally Blonde dhe Hellboy./k.m