Sekretari amerikan i Mbrojtjes, Pete Hegseth, deklaroi se Shtetet e Bashkuara kanë zgjeruar bllokadën ndaj Iran, duke e shtrirë atë në përmasa globale dhe duke rritur presionin ndaj Teheranit.
Gjatë një konference për shtyp, Hegseth e cilësoi operacionin si një mision të guximshëm dhe të rrezikshëm, ndërsa theksoi se marina amerikane po e zbaton bllokadën pa hezitim.
Sipas tij, çdo anije që konsiderohet se ka lidhje me Iranin apo portet iraniane është ndaluar dhe kthyer mbrapsht.
Ai bëri të ditur se deri më tani janë kthyer gjithsej 34 anije në ngushticën e Strait of Hormuz, ndërsa një aeroplanmbajtëse e dytë pritet t’i bashkohet operacionit në ditët në vijim.
Hegseth shtoi se Shtetet e Bashkuara kanë sekuestruar gjithashtu dy anije iraniane në rajonin Indo-Paqësor, duke theksuar se bllokada po zgjerohet përtej Lindjes së Mesme.
Në deklaratat e tij, ai përcolli edhe mesazhin e presidentit Donald Trump, duke thënë se Irani ka ende mundësi të arrijë një marrëveshje me Uashingtonin, por duhet të heqë dorë nga zhvillimi i armëve bërthamore në mënyrë të verifikueshme.
Sipas tij, në të kundërt, ekonomia iraniane do të përballet me pasoja të rënda për shkak të presionit të vazhdueshëm amerikan. Ai paralajmëroi gjithashtu se marina amerikane ka urdhër të reagojë me forcë ndaj çdo kërcënimi në rajon, përfshirë vendosjen e minave detare apo pengimin e lundrimit.
Këto zhvillime vijnë në një kohë tensionesh të larta mes SHBA-së dhe Iranit, ndërsa komuniteti ndërkombëtar ndjek me shqetësim përshkallëzimin e situatës në rajon./xmh