Last Updated on 31/07/2026 by Anisa
Të paktën gjashtë persona rezultojnë të zhdukur pas shembjes së një ndërtese në lagjen bregdetare Pistunina, në periferi të Mesinës, në Itali. Mes tyre janë katër anëtarë të së njëjtës familje. Deri më tani janë konfirmuar tre të plagosur, njëri prej të cilëve ndodhet në gjendje të rëndë.
Të plagosurit janë transportuar në Poliklinikën Universitare “Gaetano Martino” në Mesina, ku është aktivizuar plani i emergjencës dhe janë thirrur mjekë edhe nga spitale të tjera. Persona të tjerë të lënduar janë dërguar në spitale të ndryshme të qytetit dhe, sipas autoriteteve, nuk janë në rrezik për jetën.
Operacioni i kërkim-shpëtimit vijon prej orësh. Zona ku ndodhi shembja është rrethuar plotësisht dhe është mbyllur për qarkullimin, ndërsa zjarrfikësit po kërkojnë të mbijetuar nën rrënoja me ndihmën e ekipeve speciale USAR, qenve të trajnuar, dronëve dhe njësive SAF.
Komandanti i zjarrfikësve, Michele Burgio, deklaroi se ende ka shpresa për të gjetur persona të gjallë.
“Jemi ende larg kufirit kritik prej 36 orësh, ndaj ekziston mundësia për të gjetur të mbijetuar. Kërkimet po zhvillohen sipas një strategjie të bazuar në dëshmitë e mbledhura dhe në zonat ku mendohet se mund të ndodhen personat e zhdukur”, tha ai.
Sipas autoriteteve, personat që rezultojnë ende të zhdukur janë sipërmarrësi Carmelo Leone, motrat e tij Sara dhe Rosa Leone, bashkëshorti i Rosës, Santino Magazzù, punonjësi i tyre srilankez Lhairu Warnakulasuriya dhe Alessandra Frazzica, shitëse në një dyqan kinez që ndodhej në katin e parë të ndërtesës.
Familjarët e të zhdukurve kanë bërë një apel që të mos telefonohen personat e bllokuar nën rrënoja, pasi telefonat celularë po përdoren nga ekipet e shpëtimit për të lokalizuar pozicionin e tyre.
“Jam vajza e Rosa Leone. Mami dhe babi janë ende të zhdukur. Ju lutem mos i telefononi, që bateritë e celularëve të mos shkarkohen, pasi ato janë të domosdoshme për kërkimet”, shkroi në rrjetet sociale Clelia Magazzù.
Pallati i shembur ishte një ndërtesë e njohur në Mesina, e ndërtuar në fund të viteve 1980. Godina kishte katër kate me një sipërfaqe prej rreth 2.500 metrash katrorë secili. Në katin nëntokësor ndodheshin magazina, kati përdhes ishte dhënë me qira për një kasap në rikonstruksion, kati i parë ishte i zënë nga një dyqan i madh i administruar nga shtetas kinezë, ndërsa në katet e sipërme ndodheshin apartamentet e pronarëve.
Shkaqet e shembjes nuk janë ende të qarta. Prokuroria e Mesinës ka nisur një hetim ndaj personave të paidentifikuar. Sipas informacioneve paraprake, para shembjes është ndjerë një lëkundje, çka bën që autoritetet të përjashtojnë pistën e një shpërthimi. Dyshimet paraprake janë se bëhet fjalë për një shembje strukturore të ndërtesës./ad