Militantët e Shtetit Islamik vranë katër pjesëtarë të sigurisë së qeverisë siriane në veri të Sirisë këtë të hënë, në atë që konsiderohet si sulmi më vdekjeprurës i grupit ndaj forcave qeveritare që nga rrëzimi i Presidentit Bashar al-Assad.
Reuters shkruan se sulmi që ndodhi ndaj një postblloku në perëndim të qytetit Raqqa shënoi një përshkallëzim të sulmeve nga grupi xhihadist kundër qeverisë së presidentit Ahmed al-Sharaa, dy ditë pasi grupi shpalli “një fazë të re operacionale”.
Shteti Islamik nuk ka marrë menjëherë përgjegjësi për sulmin e së hënës. Por të shtunën, grupi mori përgjegjësinë për dy sulme që synonin personel të ushtrisë siriane në veri dhe lindje të Sirisë, ku u vra një ushtar sirian dhe një civil.
Agjencia shtetërore siriane tha se forcat penguan sulmin e së hënës dhe vranë një nga militantët. Ajo citoi një burim sigurie duke thënë se Shteti Islamik e kreu sulmin.
Qeveria siriane iu bashkua koalicionit të udhëhequr nga SHBA-të për të luftuar Shtetin Islamik vitin e kaluar. Në janar, forcat qeveritare morën kontrollin e Raqqas nga Forcat Demokratike Siriane të udhëhequra nga kurdët, së bashku me pjesën më të madhe të territorit përreth në veri dhe lindje të Sirisë.
Ndërkohë, forcat amerikane të hënën filluan të tërhiqen nga baza e tyre më e madhe ushtarake në verilindje, sipas tre burimeve ushtarake dhe të sigurisë siriane, pjesë e një tërheqjeje më të gjerë të trupave amerikane që ishin dislokuar në Siri një dekadë më parë për të luftuar Shtetin Islamik./mxh