Greqia është përfshirë këtë të premte, më 1 maj 2026, nga një grevë e përgjithshme 24-orëshe në kuadër të Dita Ndërkombëtare e Punës, duke sjellë ndërprerje të gjera në transportin publik dhe atë detar.
Në Athinë, metroja (linjat 1, 2 dhe 3) dhe tramvaji nuk do të funksionojnë gjatë gjithë ditës, nga fillimi deri në fund të orarit të shërbimit. Sindikatat e punëtorëve në transport, përmes një deklarate zyrtare, theksuan se pjesëmarrja në grevë është një akt për të nderuar 1 Majin dhe për të mbështetur të drejtat e punëtorëve.
Ndërkohë, autobusët dhe trolejbusët do të qarkullojnë vetëm në një orar të kufizuar, nga ora 09:00 deri në 21:00. Jashtë këtij intervali, do të ketë ndalesa pune, ndërsa linjat periferike pritet të operojnë normalisht.
Edhe transporti hekurudhor është paralizuar plotësisht. Nuk do të ketë asnjë shërbim treni në të gjithë rrjetin, përfshirë linjat periferike, si pjesë e mobilizimit të sindikatave. Kompania Hellenic Train ka njoftuar gjithashtu se disa shërbime të mbrëmjes së një dite më parë janë zëvendësuar me autobusë në segmente të caktuara.
Greva prek edhe transportin detar. Federata Detare Panhelenike ka shpallur një grevë 24-orëshe në të gjitha kategoritë e anijeve, duke nisur nga ora 00:01 e 1 majit deri në mesnatë. Si pasojë, anijet mbeten të bllokuara në porte në të gjithë vendin.
Detarët kërkojnë nënshkrimin e marrëveshjeve kolektive të punës, përmirësimin e arsimit detar dhe mbrojtjen e të drejtave të pensionistëve në sektor.
Autoritetet u bëjnë thirrje qytetarëve dhe udhëtarëve që kanë planifikuar lëvizje, veçanërisht drejt ishujve, të kontaktojnë kompanitë përkatëse për ndryshime apo anulime të biletave./kb