Policia po përpiqet të hyjë në një zonë të kontrolluar nga bandat në qendër të Haitit, ku të paktën 16 persona janë vrarë gjatë një serie sulmesh gjatë fundjavës.
Deri tani policia ka konfirmuar vetëm 16 viktima, por një gazetar lokal foli për “rreth 20 të vdekur”, ndërsa një grup i të drejtave të njeriut paralajmëroi se numri mund të jetë deri në 70.
Aktivistët lokalë thanë se banda Gran Grif, një nga organizatat kriminale më të frikshme në Haiti, ishte pas sulmeve vdekjeprurëse, të cilat sipas tyre kanë detyruar 6 mijë persona të largohen.
Dhuna e bandave ka shkatërruar prej vitesh vendin e Karaibeve dhe forca shumëkombëshe e policisë e dërguar për ta frenuar ka hasur vështirësi për të hyrë në zonat ku bandat kanë kontroll.
Banorët e zonës rurale Jean-Denis, pranë qytetit Petite-Rivière de l’Artibonite, thanë se sulmi i parë ndodhi në orët e para të së dielës.
Ata i thanë faqes së lajmeve Le Nouvelliste se banditët “erdhën nga të gjitha drejtimet”, duke i vënë flakën shtëpive dhe duke qëlluar mbi ata që iknin nga zjarri.
Të mbijetuarit përshkruan se të nesërmen gjetën trupa të shpërndarë në rrugë. Një sulm i dytë vdekjeprurës raportohet se ndodhi të hënën.
Deri tani, 16 trupa janë dërguar në morgjet pranë, por me banditët ende të pranishëm në zonë, shumë banorë kanë frikë të mbledhin trupat e të vrarëve. Zyra e Avokatit të Popullit tha se të paktën 19 persona të tjerë kanë marrë plagë nga plumbat, duke shtuar se prania e vazhdueshme e bandave e bën të vështirë verifikimin e numrit të viktimave.
Romain Le Cour Grandmaison, drejtor i Observatorit të Haitit në organizatën joqeveritare Global Initiative, i tha BBC-së se sulmi dukej shumë i koordinuar, me rrugë të bllokuara për të penguar ndërhyrjen e policisë. Ai shtoi se shpesh sulme të tilla paraprihen nga paralajmërime, por autoritetet nuk reagojnë ndaj tyre.
Sulmi besohet se është udhëhequr nga një komandant i njohur me nofkën “Ti Kenken”.
Dikur figurë kryesore e një grupi vigjilentësh të krijuar për të mbrojtur banorët nga bandat, ai kaloi në anën tjetër dhe iu bashkua bandës Gran Grif.
Le Cour Grandmaison paralajmëron se roli i tij ngre shqetësime kritike: brigadat vigjilente shpesh shihen si partnerë të domosdoshëm për të mbajtur territorin dhe për të mbështetur policinë, por çfarë ndodh kur aleancat ndryshojnë?
Sipas tij, ekziston rreziku i përshkallëzimit të dhunës ku civilët kapen gjithnjë e më shumë në mes ose bëhen shënjestra direkte, si dhe rreziku i fragmentimit të mëtejshëm ku figura si “Ti Kenken” lëvizin lirshëm mes roleve të vigjilentit, kriminelit dhe aleatit të policisë./mxh