Partia e djathtë britanike Reform UK emëroi Robert Jenrick si përgjegjës për politikat financiare, në njoftimin e parë të liderit Nigel Farage për përbërjen e ekipit të tij qeverisës në rast se fiton zgjedhjet e ardhshme kombëtare.
Reform kryeson në sondazhe përpara Partisë Laburiste në pushtet, ndërsa kryeministri Keir Starmer përballet me vështirësi në nxitjen e rritjes ekonomike dhe punësimit, si dhe me kritika për disa ndryshime të papritura në politika.
Farage emëroi ish-kandidatin për drejtimin e Conservative Party, Robert Jenrick, si “kancelar në hije”, çka do të thotë se ai pritet të shërbejë si ministër i Financave nëse Reform fiton zgjedhjet e ardhshme, të planifikuara për vitin 2029.
Partia pritet të ketë rezultate të mira në zgjedhjet vendore në maj, por Farage ka theksuar se duhet të ndërtojë më shumë përvojë qeverisëse brenda ekipit të tij përpara zgjedhjeve kombëtare.
Jenrick iu bashkua Reform muajin e kaluar, duke deklaruar se qeveria konservatore ku kishte shërbyer më parë, si dhe administrata aktuale laburiste, “e kanë thyer Britaninë”.
Farage njoftoi gjithashtu se drejtuesi i politikave në parti, Zia Yusuf, i cili aktualisht nuk është deputet, do të jetë zëdhënës për çështjet e brendshme dhe emigracionin. Ish-ministrja konservatore Suella Braverman do të drejtojë politikat për arsimin dhe barazinë, ndërsa ish-lideri i partisë, Richard Tice, do të jetë zëvendësi i Farage dhe do të mbulojë fushat e biznesit, tregtisë dhe energjisë.
Reform ka vetëm tetë deputetë në Dhomën e Komunave me 650 vende, dhe Farage ka deklaruar se do të përfshijë figura edhe jashtë politikës. Ai pranoi kritikat se partia ishte parë si një “parti me një njeri të vetëm”, duke shtuar: “Ka ardhur koha ta zgjerojmë partinë.”/mxh