“Shqipëria është një pjesë e madhe e projektit evropian”, u shpreh kryetari i Bashkisë së Brukselit, Filip Klose, në një takimin që pati me kryetarin e Bashkisë së Tiranës, Erion Veliaj. Në vizitën e tij në kryeqytetin shqiptar, Klose vlerësoi marrëdhëniet e ngushta mes Brukselit dhe Tiranës, duke theksuar se diaspora shqiptare në Belgjikë ka një rol të rëndësishëm në forcimin e këtyre lidhjeve.
“Ju e dini që Shqipëria, në veçanti Tirana, është në zemrën time. Ne kemi bashkëpunuar për shumë vite së bashku dhe është shumë e rëndësishme sepse para së gjithash, diaspora shqiptare është kaq e madhe në vendin tim. Por, gjithashtu është e rëndësishme për mua të ndaj se, si kryeqytet i Bashkimit Evropian, unë dua gjithmonë të dëshmoj se Shqipëria është një pjesë e madhe e projektit evropian”, u shpreh ai.
Nga ana e tij, Veliaj e cilësoi kryebashkiakun Klose si një mik të çmuar të Tiranës dhe Shqipërisë, duke e falënderuar për mbështetjen e dhënë, veçanërisht në kohë sfidash, si tërmeti i vitit 2019.
“Ju jam shumë mirënjohës për miqësinë! Pas tërmetit, ju ishit i pari që erdhët këtu për të vizituar disa nga familjet e prekura. Kur ditët janë me diell, edhe punët shkëlqejnë, të gjithë janë shok e miq, por kur ditët janë të vështira dhe kur janë ato ngrysjet e situatave sfiduese, aty duken shokët e vërtetë. Je një shok, një mik i vërtetë, jo vetëm i imi, por i të gjithë shqiptarëve”, theksoi Veliaj.
Në shenjë mirënjohjeje, kryebashkiaku i Tiranës i dhuroi Klose një jelek tradicional shqiptar, duke e quajtur një simbol të afrimit të tij me kulturën dhe traditat shqiptare. Vizita e kryebashkiakut të Brukselit në Tiranë u zhvillua në kuadër të “Paktit të Qyteteve të Lira”./k.k
