Last Updated on 16/05/2026 by Monika
David Beckham ka shënuar 51-vjetorin e tij me një darkë festive në hotelin luksoz “The Dorchester” në Londër, por festimi i ditëlindjes u shoqërua me një arritje edhe më të madhe: sipas Sunday Times Rich List, ai është shpallur sportisti i parë miliarder në Britani.
Sipas raportimeve, pasuria e përbashkët e tij me bashkëshorten Victoria Beckham ka kaluar rreth 1.2 miliardë paund, duke u dyfishuar gjatë vitit të fundit. Kjo e vendos çiftin në një nivel pasurie që, sipas vlerësimeve, tejkalon edhe atë të Mbretit Charles III.
Rruga e Beckham është një histori klasike suksesi. I lindur më 2 maj 1975 në Whipps Cross University Hospital në Leytonstone të Londrës Lindore, ai u rrit në një familje të thjeshtë: babai Ted punonte si teknik ngrohjeje, ndërsa nëna Sandra ishte parukiere.
Në vitin 1991, në moshën 16-vjeçare, ai iu bashkua akademisë së Manchester United, ku fitonte vetëm 29.50 paund në javë. Nga aty nisi ngritja e tij e jashtëzakonshme në futbollin botëror, duke u shndërruar në një ikonë globale dhe një nga sportistët më të paguar në histori.
Martesa me Victoria Adams, ish-anëtare e Spice Girls, e forcoi edhe më shumë statusin e tyre si “çifti mbretëror” i botës së showbiz-it.
Sot, familja Beckham zotëron një portofol të madh pasurish. Mes tyre përfshihen:
Një vilë prej rreth 50 milionë paund në Holland Park, Londër
Një pronë prej 20 milionë paund në Cotswolds me liqen, pishinë dhe fushe futbolli
Një jaht luksoz rreth 20 milionë paund i quajtur “Seven”
Një rezidencë prej 60 milionë paund në Miami me pamje nga Biscayne Bay
Shtëpia në Miami ndodhet në North Bay Road, një nga zonat më ekskluzive ku jetojnë edhe figura të njohura si Matt Damon dhe Jennifer Lopez.
Një nga faktorët kryesorë të rritjes së pasurisë së Beckham është investimi i tij në futbollin amerikan. Në vitin 2014 ai mori opsionin për të blerë një klub të Major League Soccer në Florida për rreth 16 milionë paund. Klubi, Inter Miami, u lançua disa vite më vonë dhe ka kontribuar ndjeshëm në rritjen e vlerës së tij financiare.
Pavarësisht suksesit financiar dhe profesional, familja Beckham është përballur me tensione të brendshme, përfshirë raportime për një përçarje mes djalit të madh Brooklyn dhe pjesës tjetër të familjes, si dhe mosmarrëveshje që përfshijnë edhe marrëdhëniet me nusen e familjes./mxh