Qytetet më të mëdha të Europës mund të tërheqin turmat, por disa nga vendet më të paharrueshme të kontinentit ndodhen larg shtigjeve të zakonshme turistike.
Të fshehura mes maleve, vreshtave, liqeneve dhe luginave mesjetare janë destinacione që ende duken mrekullisht të pazbuluara, ku traditat e lashta, peizazhet dramatike dhe qytetet e ruajtura bukur i kanë shpëtuar turizmit masiv.
Nga qyteti përrallor i Motovunit në Kroaci, i ngritur mbi kodër, te manastiret e Meteorës në Greqi që duken sikur sfidojnë gravitetin, e deri te fshatrat “trulli” të Italisë si në libra me përralla, Europa ka ende shumë vende sekrete për t’u zbuluar.
Në një renditje të re, European Best Destinations ka zbuluar disa nga “thesaret” më të bukura e më pak të njohura të kontinentit. Ja destinacionet e fshehura kryesore për t’u zbuluar në Europë në vitin 2026.
Në jugperëndim të Gjermanisë, vetëm gjysmë ore nga aeroporti i Shtutgartit, ndodhet qyteti piktoresk Tübingen. I njohur për një nga universitetet më të vjetra të Europës, qyteti është i pasur me histori dhe kulturë.
Në qendrën e vjetër, vizitoni kishën gotike Stiftskirche St. Georg, bashkinë e shekullit XV me orë astronomike funksionale dhe Kështjellën Hohentübingen, ku ruhen artefakte greke, romake dhe egjiptiane.
Mos humbisni një shëtitje me varkë në lumin Neckar, mes shtëpive shumëngjyrëshe, si edhe specialitetet vendase Maultaschen dhe Käsespätzle, të shoqëruara me verërat lokale Trollinger ose Lemberger.
Në zemër të Istrias, aty ku ndërthuren ndikimet kulturore të Kroacisë, Sllovenisë dhe Italisë, Motovun duket si një vend i dalë nga përrallat.
I vendosur mbi luginën e lumit Mirna, ky qytet mesjetar mbi kodër njihet për rrugicat me gurë, pamjet panoramike dhe muret e lashta të ruajtura mirë.
Ditët këtu kalohen më bukur duke shëtitur në rrugicat e ngushta, duke u ngjitur në kambanoren e qytetit dhe duke ndaluar në restorantet me tarraca, me pamje nga vreshtat dhe pyjet përreth.
Pylli i Motovunit është një nga zonat më të famshme në botë për tartufin e bardhë, ndaj kërkimi i tartufëve dhe menutë e pasura me këtë produkt janë ndër atraksionet kryesore, sidomos në vjeshtë.
Vera sjell Festivalin e Filmit në Motovun, ndërsa pranvera dhe dimri zbulojnë një anë më të qetë e romantike të qytetit.
E vendosur qetësisht në liqenin Orta, në rajonin e Piemontes, Isola San Giulio duket shumë larg turmave të Liqenit Como.
E njohur si “Ishulli i Heshtjes”, kjo ishull i vogël tërheq me atmosferën paqësore, ndërtesat historike dhe pamjet si kartolinë mbi liqen.
Në qendër ndodhet Bazilika e San Giulio, një kishë romane e shekullit XII, me afreske, vepra të lashta arti dhe mozaikë të pasur. Pranë saj, një manastir benediktin ia shton ishullit ndjesinë e qetësisë dhe reflektimit.
Ishulli arrihet lehtësisht me një udhëtim të shkurtër me varkë nga qyteti mesjetar Orta San Giulio dhe eksplorohet më së miri përmes “Rrugës së Heshtjes”, një shteg që rrethon bregun me pamje të pandërprera mbi liqen.
Në kthim në tokë, vizitorët mund të shijojnë gatime piemontese, si rizoto me Barolo, bagna càuda dhe djathëra vendas, të shoqëruara me verëra rajonale si Nebbiolo dhe Gattinara.
Në zemër të rajonit të Pulias, në jug të Italisë, Alberobello duket si një qytet i dalë nga një film fantastik.
Qyteza është e famshme për trulli-t, shtëpi të bardha prej guri me çati në formë koni, të cilat janë pjesë e trashëgimisë botërore të UNESCO-s dhe mbeten një formë unike e arkitekturës rurale.
Mënyra më e mirë për ta zbuluar Alberobellon është thjesht të humbasësh në rrugicat e tij. Lagjet Rione Monti dhe Aia Piccola janë të mbushura me qindra trulli, shumë prej të cilave sot shërbejnë si bare vere, butikë dhe restorante familjare.
Ndër vendet kryesore për t’u parë është Trullo Sovrano, i vetmi trullo dykatësh i qytetit, si edhe Kisha e Shën Antonit, e ndërtuar tërësisht në stilin tradicional trulli.
Gastronomia është një nga atraksionet kryesore të Alberobellos. Vizitorët mund të shijojnë pjata tradicionale si makaronat orecchiette, djathin kremoz burrata, focaccia barese dhe biskotat krokante taralli, të shoqëruara shpesh me verërat e njohura të rajonit të Pulias.
E ngritur mbi fushat e Greqisë qendrore, Meteora, pjesë e UNESCO-s, është e famshme për manastiret që duken sikur qëndrojnë pezull mbi shkëmbinj gjigantë të formuar nga natyra.
Të ndërtuara mes shekujve XIV-XVI, këto manastire janë ndër shembujt më të jashtëzakonshëm të monastizmit ortodoks lindor.
Sot, gjashtë prej tyre janë ende aktive, përfshirë Manastirin e Madh të Meteorës dhe Varlaam, të njohura për ikonat fetare, afresket dhe pamjet panoramike mbi fushat e Thesalisë.
Përtej manastireve, Meteora është edhe një destinacion ideal për ecje, me shtigje mes shkëmbinjve, pyjeve dhe pikave të fshehura panoramike.
Në qytetin e afërt Kalambaka, vizitorët mund të shijojnë gatime tradicionale greke si moussaka, souvlaki, spetsofai dhe ëmbëlsirën galaktoboureko./mxh