Kjo është me të vërtetë një nga ato eksperienca ku fjala “të pish një kafe” merr një kuptim krejtësisht tjetër! Imagjino të paguash 58 dollarë dhe, para se të marrësh gllënjkën e parë të kafeinës, të duhet të kalosh 30 minuta duke u mbajtur pas shkëmbit në një via ferrata. Padyshim që nuk është vendi ideal për dikë që i dridhen gjunjët nga lartësitë.
E quajtur “Cliff Coffee”, kafeneja ndodhet rreth 60 metra mbi nivelin e detit dhe konsiderohet nga shumë si një nga kafenetë më të rrezikshme në botë. Në vend të tavolinave tradicionale, klientët ulen në platforma metalike të fiksuara drejtpërdrejt në shkëmb, ndërsa shijojnë pamje mahnitëse dhe një dozë të konsiderueshme adrenaline.
Për të mbërritur në këtë destinacion unik, vizitorët duhet të përshkojnë për afro 30 minuta një shteg alpin të tipit “via ferrata”, përpara se të zbresin me litar drejt platformave, gjithmonë nën mbikëqyrjen e instruktorëve të trajnuar.
Megjithëse kafeneja funksionon prej vitit 2004, fama e saj është rritur ndjeshëm javët e fundit pasi video dhe fotografi nga vendi u bënë virale në rrjetet sociale. Interesi i madh ka bërë që rezervimet të jenë të domosdoshme, ndërsa hyrja pa praninë e stafit nuk lejohet.
Një filxhan kafe në këtë lokal kushton 398 juanë, ose rreth 58 dollarë. Sipas pronarit, çmimi nuk përfshin vetëm pijen, por edhe sigurimin, pajisjet profesionale dhe asistencën e instruktorëve gjatë gjithë eksperiencës. Vizitorët mund të qëndrojnë në platforma pa asnjë kufizim kohor.
Për personat që kanë frikë nga lartësitë, një vizitë në Cliff Coffee mund të jetë një sfidë e vërtetë. Megjithatë, për adhuruesit e aventurës, ky vend është shndërruar në një atraksion të veçantë që kombinon natyrën, adrenalinën dhe një filxhan kafe në një eksperiencë të paharrueshme./a.d