Last Updated on 05/03/2026 by Kesjana
Një dietë e pasur me fibra mund të përmirësojë ndjeshëm cilësinë e gjumit. Sipas një studimi të fundit, personat që konsumojnë më shumë fruta, perime dhe drithëra integrale kalojnë më shumë kohë në fazën e gjumit të thellë, e cila është thelbësore për rikuperimin fizik, kujtesën dhe forcimin e sistemit imunitar.
Përveç përfitimeve të njohura për shëndetin e zorrëve dhe parandalimin e sëmundjeve kronike, fibrat duket se ndihmojnë edhe në procesin e rënies në gjumë. Një dietë e pasur me fruta dhe perime mund ta bëjë më të lehtë kalimin nga gjendja e zgjimit në gjumë, duke ndihmuar që të flemë më shpejt dhe të kemi një pushim më rigjenerues.
Studimi, i cili analizoi lidhjen mes ushqimit dhe gjumit, përfshiu rreth 3.500 pjesëmarrës me moshë mesatare 53 vjeç. Për dy ditë rresht ata regjistruan në një aplikacion gjithçka që konsumonin gjatë ditës. Gjatë natës, gjumi i tyre u monitorua me pajisje të miratuara nga Food and Drug Administration (FDA), të pajisura me sensorë në gjoks, kyçin e dorës dhe gishta, që matnin rrahjet e zemrës, frymëmarrjen, nivelin e oksigjenit në gjak dhe prirjen për gërhitje.
Nga analiza e të dhënave, shkencëtarët përcaktuan sa kohë kalonin pjesëmarrësit në fazat e ndryshme të gjumit: gjumë i lehtë, gjumë i thellë dhe gjumë REM. Më pas, përmes një modeli kompjuterik, u analizua ndikimi i 25 karakteristikave të dietës në cilësinë e gjumit.
Rezultatet treguan se konsumi mesatar i fibrave ishte rreth 21 gramë në ditë, pak më pak se 30 gramët e rekomanduar për parandalimin e disa sëmundjeve, përfshirë kancerin e zorrës së trashë. Kjo sasi përkthehet në rreth pesë porcione fruta dhe perime në ditë, së bashku me të paktën dy porcione makarona ose bukë integrale.
Personat që konsumuan më shumë fibra se mesatarja përjetuan një gjumë më cilësor: ata kaluan rreth 3,4% më shumë kohë në gjumë të thellë dhe 2,3% më pak kohë në gjumë të lehtë.
Shkencëtarët dyshojnë se ky efekt lidhet me fermentimin e fibrave nga mikroorganizmat e zorrëve, proces që prodhon acide yndyrore me zinxhir të shkurtër, si butirati. Këto substanca mund të ulin inflamacionin dhe të përmirësojnë komunikimin mes zorrëve dhe trurit, duke ndikuar pozitivisht edhe në cilësinë e gjumit.
Megjithëse nevojiten studime të tjera për ta konfirmuar plotësisht këtë mekanizëm, ekspertët theksojnë se përfshirja e më shumë fibrave në dietën e përditshme mund të jetë një mënyrë e thjeshtë dhe natyrale për të përmirësuar jo vetëm shëndetin, por edhe cilësinë e gjumit.