“Ndoshta thjesht nuk besuan tek unë”, tha ylli i popit për studion Universal, e cila ishte gati të realizonte një film për jetën e saj me protagoniste Julia Garner.
Andrew Pulver
Madonna ka deklaruar se filmi biografik për jetën e saj, i cili ishte në zhvillim prej vitesh dhe që ajo e mbikëqyrte personalisht, u anulua pasi pati mosmarrëveshje me studion hollivudiane Universal lidhur me buxhetin e projektit.
Duke folur për revistën Interview, Madonna tha: “U përplasëm me Universal për çështjen e buxhetit, sepse kisha nevojë për një buxhet të madh. Kam pasur një jetë të jashtëzakonshme, një jetë të madhe, ndaj më duhej edhe një buxhet i madh.”
Këngëtarja tregoi se kishte propozuar zhvendosjen e xhirimeve në Serbi për të ulur kostot, por studioja nuk e mbështeti idenë.
“Gjeta një mënyrë për ta realizuar filmin me më pak para në Serbi, por nuk mendoj se atyre u pëlqeu kjo ide. Nuk e di. Ndoshta thjesht nuk besuan tek unë. Një nga reagimet e tyre të para ishte: ‘Nuk besojmë se do të qëndrosh në Serbi më shumë se katër ditë’.”
Ajo shtoi: “U thashë: ‘A e keni lexuar skenarin?’ E gjithë jeta ime ka qenë një luftë për mbijetesë. Nuk do të shkoja atje për pushime.”
Projekti u njoftua për herë të parë në vitin 2020, kur Madonna planifikonte të drejtonte një skenar të shkruar së bashku me Diablo Cody. Në atë kohë ajo deklaroi: “Është thelbësore që ta tregoj këtë udhëtim të trazuar të jetës sime me zërin dhe vizionin tim.”
Kjo erdhi pasi Madonna kishte kritikuar projektin e diskutuar Blond Ambition, një film për vitet e hershme të karrierës së saj, të cilin Universal e kishte blerë në vitin 2017.
“Pse Universal Studios do të donte të bënte një film për mua bazuar në një skenar që është tërësisht gënjeshtër?” kishte shkruar ajo në Instagram.
Julia Garner u përzgjodh për rolin kryesor pas një procesi rigoroz audicionesh që në industrinë e filmit u quajt “Madonna Bootcamp”. Megjithatë, në vitin 2023 u raportua se filmi, me titullin e përkohshëm Who’s That Girl, ishte anuluar.
Madonna ka drejtuar më parë dy filma artistikë: Filth and Wisdom, që rrëfen historinë e një muzikanti ukrainas që përpiqet të mbijetojë në Londër, dhe W.E., kushtuar historisë së Wallis Simpson dhe mbretit të abdikuar Edward VIII. Ajo ka luajtur gjithashtu në filma si Desperately Seeking Susan, Dick Tracy, Evita dhe The Next Best Thing.
Në intervistë, Madonna zbuloi gjithashtu se nuk kishte mundur të çonte përpara një serial të propozuar nga Netflix, pasi të drejtat mbi skenarin e filmit mbeteshin në pronësi të Universal.
“Netflix më kontaktoi për të bërë një serial. Ishte një proces krejt tjetër, sepse nuk mund ta përdorja skenarin që kisha shkruar për Universal, përveçse po ta blija prej tyre me një çmim absurd, edhe pse ishte vepra ime. Fillova të mendoja se si mund të funksiononte formati i serialit, por është një proces krejt ndryshe. Duhet të takosh shumë skenaristë dhe të gjesh showrunner-in e duhur, dhe unë nuk arrita ta gjeja.”