Rusia ka akuzuar liderët europianë për qëndrime kontradiktore ndaj luftës në Ukrainë, duke deklaruar se thirrjet për paqe bien ndesh me mbështetjen ushtarake që po i ofrohet Kievit.
Zëdhënësi i Kremlinit, Dmitry Peskov, tha se në kushtet aktuale është e vështirë të imagjinohen negociata me Ukrainën, duke akuzuar autoritetet në Kiev për veprime që Moska i cilëson si terroriste dhe kriminale.
Peskov kritikoi gjithashtu liderët e Francës, Gjermanisë dhe Britanisë së Madhe, duke deklaruar se ata flasin për paqe, ndërsa njëkohësisht mbështesin zhvillimin dhe furnizimin e Ukrainës me armë të reja për vazhdimin e luftës.
Sipas Kremlinit, kjo tregon qëllimet e vërteta të kryeqyteteve europiane dhe vë në pikëpyetje sinqeritetin e përpjekjeve për arritjen e një armëpushimi.
Deklaratat vijnë një ditë pasi liderët europianë mbështetën propozimin për zhvillimin e bisedimeve të drejtpërdrejta mes presidentit ukrainas Volodymyr Zelensky dhe presidentit rus Vladimir Putin, me synimin për të arritur një armëpushim dhe për të hapur rrugën drejt një zgjidhjeje diplomatike të konfliktit.
Lufta në Ukrainë vazhdon të mbetet një nga krizat më të mëdha të sigurisë në Europë, ndërsa përpjekjet ndërkombëtare për paqe përballen me mosbesim të thellë mes palëve./MXH