Pushimet mbarojnë pothuajse gjithmonë më shpejt nga sa do të donim. Nga deti, dielli dhe oraret e çrregulluara kalojmë sërish te zgjimi me zile, trafiku, zyra dhe lista e detyrave që duket sikur na ka pritur gjithë verën.
Për shumë njerëz, ky kalim i menjëhershëm shoqërohet me atë që mund të quhet stresi i rikthimit: një gjendje shqetësimi, lodhjeje, nervozizmi dhe rënieje të humorit që shfaqet pas përfundimit të një periudhe të gjatë pushimi. Nuk bëhet fjalë domosdoshmërisht për një sëmundje, por për vështirësinë e organizmit dhe mendjes për t’u përshtatur sërish me ritmin e përditshëm.
Pagjumësia, mungesa e përqendrimit, nervozizmi, lodhja, ankthi dhe ndjenja se gjithçka po na bie njëherësh mbi kokë janë ndër shenjat më të zakonshme. Në vend që ta trajtojmë kthimin si një goditje të vetme, mund ta bëjmë më të lehtë duke e ndarë në hapa të vegjël.
- Rikthejeni gradualisht ritmin e gjumit
Gjatë pushimeve orari i gjumit shpesh zhvendoset: flemë më vonë, zgjohemi më vonë dhe ndonjëherë flemë më gjatë. Kthimi i menjëhershëm te orari i punës mund të jetë i lodhshëm.
Prandaj, ditët e fundit të pushimeve mund të përdoren për të afruar gradualisht orarin me atë që do të keni pas rikthimit. Synoni një gjumë të rregullt dhe të mjaftueshëm, ndërsa në mbrëmje mund të ndihmojë një rutinë qetësuese, si një dush i ngrohtë, leximi ose një pije e ngrohtë pa kafeinë.
- Mos u ktheni në punë në minutën e fundit
Nëse është e mundur, kthehuni në shtëpi disa ditë përpara se të rifillojë puna. Kjo kohë shërben si një lloj “zone tampon”: keni mundësi të sistemoni bagazhet, shtëpinë dhe orarin e gjumit pa e përzier menjëherë gjithë këtë me ritmin e zyrës.
Edhe rikthimi në punë duhet të jetë sa më gradual. Në ditët e para, më pak mund të jetë vërtet më shumë.
- Lëvizni
Aktiviteti fizik është një nga mënyrat më të thjeshta për të larguar tensionin e akumuluar. Ecja, vrapi i lehtë, çiklizmi, noti ose ushtrime të moderuara mund t’ju ndihmojnë të rifitoni ritmin dhe të përmirësoni gjumin.
Nuk është e nevojshme të filloni me një program të rëndë. Edhe një shëtitje e përditshme mund të jetë një mënyrë e mirë për ta ndarë ditën e punës nga pjesa tjetër e ditës.
- Ushqehuni rregullisht dhe me ekuilibër
Pas pushimeve, kur ushqimi mund të ketë qenë më i çrregullt, është koha për t’u kthyer te një dietë e rregullt dhe e larmishme.
Karbohidratet, proteinat, yndyrnat e shëndetshme, frutat, perimet dhe drithërat duhet të jenë pjesë e një ushqyerjeje të ekuilibruar. Edhe hidratimi është i rëndësishëm, sidomos pas ditëve të nxehta të verës.
Mos kërkoni një “ushqim magjik” kundër ankthit. Më e dobishme është një rutinë e qëndrueshme ushqimore dhe shmangia e teprimit me alkoolin, sheqernat dhe kafeinën, veçanërisht në orët e mbrëmjes.
- Mos hiqni dorë nga dielli
Pushimet na mësojnë me dritën natyrale dhe jetën në ajër të hapur. Kthimi në ambiente të mbyllura, sidomos në zyrë, mund të ndihet si një ndryshim i fortë.
Kur mundeni, dilni jashtë gjatë ditës. Një shëtitje në ajër të pastër ose pushimi i drekës jashtë zyrës mund të jetë më i dobishëm sesa të qëndroni gjithë ditën nën dritën artificiale.
- Mos e nisni ditën me katastrofën e të gjitha detyrave
Pas pushimeve, lista e punëve duket shpesh e pafundme. Gabimi është të përpiqeni t’i zgjidhni të gjitha njëherësh.
Zgjidhni disa prioritete të arsyeshme për ditën e parë dhe shtyjini ato që nuk janë urgjente. Kjo e bën rikthimin më të menaxhueshëm dhe shmang ndjesinë se puna po ju mbyt që në orët e para.
- Bëni pushime gjatë ditës
Trupi dhe mendja nuk janë ndërtuar për të qëndruar për orë të tëra pa ndërprerje përpara një ekrani.
Çohuni rregullisht nga karrigia, lëvizni, shikoni larg ekranit dhe merrni pak ajër. Edhe pushimet e shkurtra mund të ndihmojnë për të ulur tensionin dhe për të rifituar përqendrimin.
- Lëreni telefonin jashtë shtratit
Një nga zakonet më të këqija të mbrëmjes është ta marrim telefonin në shtrat dhe të vazhdojmë të kontrollojmë mesazhe, lajme apo rrjete sociale.
Dhoma e gjumit duhet të lidhet sa më shumë me gjumin dhe pushimin. Për këtë arsye, është e dobishme të shmangni ekranet para gjumit dhe, nëse është e mundur, të mos e mbani telefonin pranë krevatit.
- Fëmijët kanë nevojë për një rikthim të butë
Edhe për fëmijët fundi i pushimeve mund të jetë një ndryshim i fortë. Pas javësh me orare të lira, zgjimi herët, qëndrimi për orë të gjata në bankë dhe detyrat e shtëpisë kërkojnë një periudhë përshtatjeje.
Ditët para fillimit të shkollës mund të përdoren për të rikthyer gradualisht orarin e gjumit dhe zgjimit. Kjo e bën më të lehtë kalimin nga ritmi i pushimeve te ai shkollor.
- Mos e konsideroni fundjavën si një tjetër javë pune
Kthimi në punë nuk do të thotë se duhet të hiqni dorë menjëherë nga çdo formë relaksi.
Nëse java ka qenë e lodhshme, përdoreni fundjavën për familjen, miqtë, natyrën, një shëtitje ose thjesht për të mos bërë asgjë. Një fundjavë e qetë mund të shërbejë si një mini-pushim dhe t’ju ndihmojë të hyni më mirë në javën pasuese.
+1. Jepini mendjes pak heshtje
Në këtë periudhë, vëmendja e ndërgjegjshme – mindfulness – dhe meditimi mund të jenë mjete të dobishme për menaxhimin e stresit.
Nuk kërkohet domosdoshmërisht një seancë e gjatë. Disa minuta në ditë, duke u përqendruar te frymëmarrja, te trupi dhe te ajo që po ndodh në momentin e tanishëm, mund të ndihmojnë në shkëputjen nga mendimet e pafundme për atë që duhet bërë nesër.
Në fund të fundit, problemi nuk është vetëm se pushimet mbaruan. Është mënyra se si mendja e përjeton kthimin. Nëse e shohim si një përplasje të menjëhershme me gjithë detyrimet e lëna pas, rikthimi bëhet më i rëndë. Nëse e ndërtojmë ditë pas dite, trupi dhe mendja kanë kohë të marrin sërish ritmin.
Pushimet mund të kenë mbaruar, por kjo nuk do të thotë se duhet të mbarojë edhe qetësia që morëm prej tyre.
Burimi: Il Messaggero/ Përgatiti për botim: L. Veizi