Last Updated on 28/08/2026 by Monika
Disa prej kompanive më të mëdha ajrore amerikane kanë njoftuar hapjen e një sërë linjash të reja direkte drejt Europës gjatë vitit 2027. Alaska Airlines, American Airlines, Delta dhe United Airlines do të lidhin qytete të SHBA-së me destinacione europiane, duke shtuar mundësitë e udhëtimit për sezonin e ardhshëm.
Alaska Airlines do të nisë pranverën e ardhshme fluturimet e saj të para nga Seattle drejt Athinës dhe Parisit. Linja Seattle-Athinë do të nisë më 12 maj 2027 dhe do të operojë tri herë në javë, ndërsa fluturimet drejt aeroportit Paris Charles de Gaulle do të fillojnë më 25 maj, me pesë fluturime në javë. Të dyja linjat sezonale do të jenë aktive deri në tetor 2027.
American Airlines ka konfirmuar gjithashtu zgjerimin e programit ndërkombëtar për verën e vitit 2027. Kompania do të shtojë nga Philadelphia destinacionet Porto dhe Vjenë për herë të parë, ndërsa do të rikthejë fluturimet drejt Reykjavikut për herë të parë që nga viti 2019.
American Airlines do të jetë gjithashtu e vetmja kompani ajrore amerikane që do të ofrojë fluturime drejt Vjenës, kur linja e re të nisë në maj të vitit të ardhshëm.
Zgjerimi përfshin edhe fluturime të reja direkte nga aeroporti JFK i Nju Jorkut drejt Amsterdamit dhe Nicës, nga Charlotte drejt Barcelonës, si dhe shtimin e një fluturimi të katërt ditor mes Nju Jorkut dhe aeroportit Heathrow të Londrës.
Fluturimi Nju Jork-Amsterdam do të nisë më 28 mars 2027, ndërsa linja Nju Jork-Nicë do të fillojë më 6 maj. Po atë ditë do të nisë edhe lidhja Philadelphia-Vjenë, ndërsa fluturimet nga Charlotte drejt Barcelonës dhe nga Philadelphia drejt Reykjavikut do të fillojnë më 27 maj.
Delta do të nisë më 27 mars 2027 fluturimin e parë të drejtpërdrejtë mes Austin, në Teksas, dhe Paris Charles de Gaulle. Linja do të operojë çdo ditë gjatë sezonit veror.
Gjatë muajve të pikut të verës, Delta, Air France dhe KLM pritet të ofrojnë deri në 10 fluturime direkte në javë mes Austin dhe Europës, me lidhje drejt Parisit dhe Amsterdamit.
Ndërkohë, United Airlines ka njoftuar zgjerimin më të madh në historinë e saj, duke shtuar 10 qytete të reja në rrjetin ndërkombëtar gjatë vitit 2027.
Kompania do të nisë fluturime direkte nga Washington Dulles drejt Toulouse, ndërsa nga Newark do të shtojë destinacionet Luksemburg, Marsejë, Ibiza, Valencia, Terceira, Ljubljana, Olbia në Sardenjë dhe Catania në Siçili.
Linja Newark-Luksemburg do të nisë më 2 prill dhe do të operojë çdo ditë, ndërsa fluturimet Washington Dulles-Toulouse do të fillojnë më 26 prill.
Nga 12 maji, United do të lidhë Newark me Ljubljanën me katër fluturime në javë. Fluturimet drejt Olbias do të nisin më 27 maj, ndërsa një ditë më pas do të fillojë linja Newark-Catania.
Lidhja Newark-Ibiza do të nisë më 31 maj, ndërsa Valencia do të shtohet më 2 qershor. Fluturimet drejt Marsejës do të jenë të përditshme nga 4 qershori, ndërsa Terceira do të lidhet me Newark nga 9 qershori, me tri fluturime në javë.
United do të shtojë gjithashtu një fluturim të ri tri herë në javë nga Washington DC drejt Milanos duke filluar nga 28 maji, si dhe një fluturim të përditshëm nga Denver drejt Parisit nga 27 maji 2027.