520 shtetas etiopianë janë dënuar me vdekje për trafik droge në Arabinë Saudite dhe janë në pritje të ekzekutimit. Sipas organizatës joqeveritare Amnesty International, Arabia Saudite renditet e treta në botë për sa i përket numrit të ekzekutimeve të kryera midis viteve 2022 dhe 2025, pas Kinës dhe Iranit..
Autoritetet në Riad njoftuan të premten se kishin ekzekutuar dy etiopianë të dënuar për trafik droge, një javë pasi ekzekutuan pesë nga bashkatdhetarët e tyre të dënuar për të njëjtin krim.
Pesë të tjerë u ekzekutuan në qershor dhe i njëjti numër në korrik, duke e çuar numrin total të etiopianëve të ekzekutuar këtë vit në 34. Ky është numri më i lartë i të huajve të ekzekutuar nga autoritetet saudite.
Mijëra etiopianë, duke udhëtuar nëpër rrugën lindore të rrezikshme që lidh Bririn e Afrikës me monarkinë e naftës së Gjirit nëpërmjet Jemenit, shkojnë në Arabinë Saudite për të gjetur punë, zakonisht si punëtorë të pakualifikuar.
OJQ-ja Human Rights Watch (HRW) shpesh i kërkon mbretërisë të ndryshojë dënimet me vdekje të dhjetëra të huajve, veçanërisht qytetarëve etiopianë, të dënuar për krime “jo të dhunshme”, kryesisht trafikim droge. Riadi thotë se dënimi me vdekje është i nevojshëm për të ruajtur rendin dhe siguron se e zbaton atë vetëm pasi të jenë shteruar të gjitha mjetet ligjore./ad