Last Updated on 10/06/2026 by Anisa
Juristi dhe analisti Kreshnik Spahiu ka bërë një analizë të lëvizjeve popullore në rajon, duke tërhequr një paralelizëm të drejtpërdrejtë mes dështimit të protestave në Serbi dhe revoltës që po zhvillohet aktualisht në Tiranë.
Përmes një reagimi publik, Spahiu ngre pyetjen se si ka mundësi që një popull që protestoi për dy vite rresht çdo ditë në Beograd nuk arriti ta rrëzonte pushtetin, duke paralajmëruar se i njëjti skenar rrezikon të djegë dhe të çojë dëm energjinë e protestave në Shqipëri.
Sipas Spahiut, bilanci i dy viteve revoltë në Serbi tregoi se masiviteti pa një strategji të qartë politike nuk mjafton. Ai vë në dukje se ndonëse protestat në Beograd ishin aq të fuqishme sa detyruan figura si Ivanka Trump dhe Jared Kushner të tërhiqnin kompaninë e tyre “Affinity Partners” nga projektet miliardere në dhjetor të vitit të kaluar, Aleksandër Vuçiç sërish mbijetoi sepse rruga nuk u përkthye në rezultat politik.
Duke bërë skanimin e asaj që ndodhi në Serbi, Spahiu rreshton gabimet fatale që sipas tij duhet të shërbejnë si leksion urgjent për protestuesit në Tiranë.
Analiza e plotë e Kreshnik Spahiut:
Në Beograd u protestua 2 vjet çdo ditë, por Vuçiç nuk dha dorëheqje dhe, fatkeqësisht, është në pushtet.
A e dini pse dështuan 1 milion protestues në Serbi?
* Protesta nuk prodhoi një kandidat të ri për president apo kryeministër për të garuar dhe fituar me vota përballë Vuçiçit.
* Studentët serbë nuk arritën të gjenin lidershipin dhe nuk zgjodhën dot një strukturë drejtuese.
* Ata nuk krijuan parti të re politike por kërkonin zgjidhje sërish me partitë e vjetra.
* Ata nuk krijuan një platformë të qartë kërkesash politike për të sjellë ndryshime politike.
* Ata u bashkuan me protestues të partive të ndryshme dhe u përdorën prej tyre.
* Protestat rriteshin, por elektorati i Vuçiçit nuk ndryshonte.
* Me kalimin e kohës u lodhën dhe nuk kishin financime për t’i vazhduar.
* Në protestë merrnin pjesë dhjetëra grupime politike me interesa të ndryshme dhe kjo pamundësonte krijimin e një organizate politike të re.
A e dini pse u larguan Ivanka dhe Kushner një vit më parë nga projekti i investimit në Beograd?
* Në dhjetor të vitit 2025 Ivanka Trump u largua nga projekti në Serbi. Kompania Affinity Partners në pronësi të Jared Kushner (dhëndri i Donald Trump) njoftoi tërheqjen zyrtare nga aplikimi dhe dorëzimin nga projekti. Kompania deklaroi se projekte të tilla duhet të bashkojnë njerëzit dhe jo t’i ndajnë ata. Protestat dhe sulmet mediatike e detyruan të largohet.
Analiza nuk është për të treguar se në Shqipëri po përdoret i njejti skenar serb, por për të informuar dhe orientuar ata që energjinë e protestave madhështore në Shqipëri mund ta çojnë dëm.
Mos harroni, protesta është fillimi dhe jo mbarimi.
Në politikë dhe në futboll suksesi matet me rezultat.
Madje kur ndeshja dështon, populli të kryqëzon dhe akuzon shpesh edhe pa të drejtë duke thënë:
* ishin të paaftë
* ishin të futur
* ishin kalamaj
* ishin të shitur
* ishin vegla
Për këto arsye duhet fituar lufta, se në të kundërt veç do e forconi Ramën dhe Berishën.
Jo në burg nuk do i çoni, por do na i bëni peshqesh edhe 10 vite të tjera.
“Historia shkruhet nga fituesit.” na ka mësuar dikur Winston Churchill/a.d
