Një studim i ri shkencor ka zbuluar se yndyra viscerale, dhjami që grumbullohet rreth organeve të brendshme, mund të lidhet me plakjen më të shpejtë të trurit dhe rënien e funksioneve njohëse.
Hulumtimi u drejtua nga studiues të Ben-Gurion University of the Negev në Izrael dhe sugjeron se reduktimi i kësaj lloj yndyre përmes stilit të shëndetshëm të jetesës mund të ndihmojë në mbrojtjen e trurit nga atrofia dhe plakja e parakohshme.
Sipas studiuesve, yndyra viscerale ndikoi negativisht në strukturën dhe funksionin e trurit, ndërsa yndyra nënlëkurore, ajo që ndodhet nën lëkurë dhe ndikon më shumë në peshën trupore, nuk tregoi lidhje të rëndësishme me shëndetin e trurit.
Studimi analizoi të dhënat e 533 të rriturve, të cilët u ndoqën për periudha nga 5 deri në 16 vjet. Pjesëmarrësit iu nënshtruan skanimeve MRI, testeve njohëse dhe analizave të gjakut për të matur ndryshimet në tru dhe nivelin e sheqerit në gjak.
Rezultatet treguan se personat me më pak yndyrë viscerale kishin:
-vëllim më të lartë të trurit,
-performancë më të mirë njohëse,
-dhe ritëm më të ngadaltë të atrofisë së trurit.
Shkencëtarët zbuluan gjithashtu se nivelet e larta të glukozës në gjak dhe rezistenca ndaj insulinës mund të luajnë rol kyç në dëmtimin e trurit.
Epidemiologia Iris Shai tha se kontrolli i glukozës dhe reduktimi i yndyrës abdominale mund të jenë objektiva të rëndësishëm për të ulur rrezikun e rënies njohëse dhe sëmundjeve neurodegjenerative.
Studiuesit theksojnë se edhe humbja modeste e yndyrës viscerale përmes dietës së shëndetshme dhe aktivitetit fizik mund të ketë përfitime të rëndësishme për shëndetin e trurit.
Megjithatë, ata paralajmërojnë se nevojiten studime të mëtejshme, pasi pjesa më e madhe e pjesëmarrësve në kërkim ishin meshkuj dhe persona mbipeshë./ kb