Vatikani njofton se Papa po rikuperohet mirë dhe do të mund të vizitojë Uruguain, Argjentinën dhe Perunë nga 6 deri më 17 nëntor. Mjekët nuk kanë konstatuar komplikacione që mund të pengojnë udhëtimin.
Papa Leoni XIV do të udhëtojë drejt Uruguait, Argjentinës dhe Perusë nga 6 deri më 17 nëntor, sipas planit fillestar. Zyra e Shtypit e Selisë së Shenjtë konfirmoi zyrtarisht vizitën pasi mjekët vlerësuan ecurinë e mirë të gjendjes shëndetësore të Papës pas ndërhyrjes së fundit kirurgjikale.
Sipas deklaratës së Vatikanit, ndërhyrja u krye pa komplikacione, ndërsa ekzaminimet e mëvonshme konfirmuan se sëmundja ishte e lokalizuar. Për këtë arsye, Papa nuk ka nevojë për trajtim të mëtejshëm onkologjik.
Dy javë pas operacionit, kontrollet e fundit mjekësore tregojnë se rikuperimi po ecën mirë dhe nuk ka kundërindikacione për realizimin e udhëtimit.
Pas kthimit në Vatikan, Leoni XIV i ka rifilluar gradualisht aktivitetet, duke ndjekur një program të përshtatur sipas rekomandimeve mjekësore dhe duke lënë kohë të mjaftueshme për pushim. Mjeku Luigi Carbone, përgjegjës për informimin mbi ecurinë e gjendjes së tij shëndetësore, ka konfirmuar se Papa gëzon shëndet të mirë.
Ati i Shenjtë ka shprehur gëzimin për rikthimin në Amerikën Latine, një rajon me të cilin ka lidhje të ngushta personale.
“Më mbush me gëzim rikthimi në kontinentin ku kam përjetuar kaq shumë momente të jetës sime”, është shprehur ai.
Gjatë vizitës, Papa synon të forcojë lidhjet me komunitetet katolike dhe të përcjellë një mesazh besimi, shprese dhe paqeje./mxh