Paramount njoftoi të premten se afati i pritjes sipas rregullave të konkurrencës në SHBA për ofertën e saj prej 108.4 miliardë dollarësh për Warner Bros Discovery ka përfunduar më 19 shkurt. Ky zhvillim shënon një hap të rëndësishëm drejt një marrëveshjeje të mundshme për blerjen e kompanisë që zotëron HBO Max.
Sipas Paramount, përfundimi i këtij afati “do të thotë se nuk ka pengesa ligjore në SHBA për mbylljen e blerjes së propozuar”, megjithatë theksohet se skadimi i periudhës 10-ditore sipas Aktit Hart-Scott-Rodino nuk i jep fund shqyrtimit nga Departamenti i Drejtësisë i SHBA-ve.
Departamenti i Drejtësisë mund të vazhdojë hetimet, të kërkojë informacion shtesë dhe madje të padisë për të bllokuar transaksionin para se ai të mbyllet. Një precedent i tillë ndodhi në vitin 2023, kur departamenti paditi për të ndalur bashkimin JetBlue–Sprint, disa muaj pasi afati i pritjes kishte përfunduar.
Ndërkohë, Paramount nuk ka ende një marrëveshje përfundimtare me Warner Bros Discovery, e cila ka nënshkruar një marrëveshje tjetër me Netflix. Netflix ka ofruar të blejë studiot dhe asetet e transmetimit për 27.75 dollarë për aksion, ose rreth 82.7 miliardë dollarë në total.
Edhe marrëveshja me Netflix pritet të përballet me një shqyrtim të fortë nga autoritetet e konkurrencës në SHBA dhe Europë, të cilat do të vlerësojnë nëse bashkimi i fuqisë globale të transmetimit të Netflix me asetet historike të studiove të Warner Bros Discovery do të ulte konkurrencën ose do të kufizonte zgjedhjen e konsumatorëve./kb