Çështja ka kaluar në duart e policisë britanike pasi akuzat e ngritura ndaj partisë populiste Reform UK mund të kenë pasoja penale. Policia ka zgjeruar hetimin për të përfshirë edhe pretendimet se zyrtarë të partisë kanë diskutuar mënyra për të shkelur ligjin mbi financimin e partive politike nga burime të huaja.
Reform UK, e drejtuar nga Nigel Farage, i ka mohuar të gjitha akuzat dhe ka deklaruar se do të bashkëpunojë plotësisht me hetimin.
Skandali shpërtheu pas transmetimit të një dokumentari nga grupi investigativ Verbatim. Në pamjet e publikuara shfaqen dy zyrtarë të lartë të Reform UK, James Orr dhe Dan Jukes, duke diskutuar për financimin me një person që paraqitej si biznesmen amerikan dhe me djalin e tij që jeton në Britani. Në biseda diskutohej edhe për pagesën e tre sondazheve të opinionit të porositura nga partia.
Pas publikimit të dokumentarit, Reform UK nisi një hetim të brendshëm dhe i mohoi akuzat, duke pretenduar se partia ishte bërë pjesë e një kurthi. Farage i cilësoi disa nga deklaratat e regjistruara si “biseda pa shumë peshë”. Policia Metropolitane e Londrës njoftoi se kishte shqyrtuar disa raportime lidhur me donacionet dhe sondazhet e një partie politike. Sipas policisë, janë identifikuar shkelje të mundshme që kërkojnë hetim.
Hetimi i ri do t’i bashkohet një hetimi tjetër që policia ka nisur më herët ndaj Reform UK për donacione të dyshimta. Autoritetet po shqyrtojnë nëse mund të ketë pasur fshehje të burimit të parave ose dhënie të informacionit të rremë për financimin e partisë. Policia britanike kishte njoftuar që në korrik se po hetonte Reform UK për shkelje të mundshme të ligjeve mbi donacionet politike.
Zgjerimi i hetimit shton presionin mbi partinë e Farage, e cila prej muajsh ka pasur rezultate të forta në sondazhet e opinionit. Megjithatë, mbështetja për Reform UK ka filluar të lëkundet pas akuzave për financimin e saj. Në qendër të një tjetër hetimi është edhe një donacion prej 5 milionë paundësh për Nigel Farage, i cili po shqyrtohet nga një organ parlamentar.
Çështja shpërtheu në një moment të rëndësishëm për Reform UK. Në konferencën vjetore të partisë javën e kaluar, Farage synonte të prezantonte planin e tij për 100 ditët e para në pushtet, nëse partia fiton zgjedhjet e ardhshme parlamentare.
Por konferenca u dominua nga akuzat e publikuara në dokumentar. Në vend që të fokusohej te zgjedhjet dhe programi i partisë, Reform UK u detyrua të përballej me pyetjet mbi financimin dhe sjelljen e zyrtarëve të saj.
Një zëdhënës i Reform UK tha se partia nuk do të komentojë më tej për sa kohë hetimi është në zhvillim. Hetimi nuk do të thotë se Reform UK apo drejtuesit e saj janë shpallur fajtorë. Policia tani do të mbledhë prova dhe do të përcaktojë nëse ka pasur shkelje të ligjit./mxh