Last Updated on 16/02/2026 by Monika
Një nga peizazhet më të njohura romantike të Italisë, harku natyror shkëmbor në kompleksin bregdetar Faraglioni di Sant’Andrea, u shemb gjatë stuhive të fuqishme që goditën jugun e vendit në fundjavën e Shën Valentinit, duke i dhënë fund një tradite shekullore të lidhur me dashurinë dhe turizmin.
I njohur gjerësisht si “Harku i të Dashuruarve”, formacioni shkëmbor në bregdetin e Salentos kishte tërhequr për dekada çifte nga e gjithë bota. Sipas legjendës lokale, puthja nën hark garantonte dashuri të përjetshme, ndaj zona ishte kthyer në destinacion propozimesh martese, përvjetorësh dhe ceremonish simbolike.
Sipas autoriteteve vendore, struktura e brishtë e gurit u dorëzua pas një stuhie intensive që përfshiu rajonin e Pulias. Kryetari i bashkisë së Melendugnos e cilësoi shembjen “një goditje në zemër” dhe një dëm të rëndë për imazhin turistik të zonës.
Harku ishte formuar ndër shekuj nga erozioni i erërave dhe dallgëve të Detit Adriatik mbi shkëmbin calcarenit. Fillimisht përdorej si pikë vrojtimi kundër piratëve, por që nga fundi i shekullit XVIII u shndërrua në simbol romantik.
Rritja e temperaturave detare dhe fenomenet ekstreme meteorologjike konsiderohen faktorë kryesorë që përshpejtuan degradimin. Formacioni ishte dëmtuar edhe më herët nga cikloni Harry në janar, ndërsa një projekt restaurimi i propozuar në vitin 2024 nuk arriti të financohej.
Banorët vendas reaguan me trishtim në rrjete sociale. Një prej tyre, që kishte bërë propozimin e martesës në këtë vend më shumë se 40 vjet më parë, shkroi se tashmë i kishin mbetur vetëm fotografitë.
Autoritetet njoftuan se mbetjet e harkut do të lihen të shpërndahen natyrshëm në det. Ndërkohë, rajoni përballet me pasoja të tjera të motit ekstrem në jug të Italisë, përfshirë rrëshqitje dheu dhe përmbytje.
Shembja e harkut konsiderohet një humbje jo vetëm natyrore, por edhe kulturore, një nga vendet më të lumtura të Italisë është zhdukur përgjithmonë nga harta./mxh