Last Updated on 30/03/2026 by Anisa
Spanja ka mbyllur hapësirën e saj ajrore për avionët e përfshirë në operacionin “Epic Fury” të SHBA-së dhe Izraelit kundër Iranit.
Madridi jo vetëm që nuk lejon përdorimin e bazave të Rota-s në Cádiz dhe Morón de la Frontera në Sevilla nga avionë luftarakë apo avionë furnizimi në ajër që marrin pjesë në sulme, por tani nuk miraton as kalimin e avionëve amerikanë që janë të stacionuar në vende të treta, si Britania e Madhe ose Franca, sipas burimeve ushtarake që citon gazeta spanjolle El País.
Mbyllja e hapësirës ajrore spanjolle – e cila detyron avionët ushtarakë të shmangin Spanjën (anëtare e NATO-s) gjatë rrugës së tyre drejt Lindjes së Mesme – nuk zbatohet në raste emergjence, shton gazeta El País.
Kryeministri spanjoll, Pedro Sánchez, e kishte paralajmëruar këtë vendim të mërkurën e kaluar nga foltorja e parlamentit spanjoll, megjithëse – sipas El País – deklaratat e tij kishin kaluar pa u vënë re.
“Ne i kemi refuzuar Shteteve të Bashkuara përdorimin e bazave të Rota-s dhe Morón-it për këtë luftë të paligjshme. Të gjitha planet e fluturimeve që lidhen me operacionin në Iran janë refuzuar, përfshirë edhe ato të avionëve të furnizimit në ajër”, tha ai, duke iu referuar refuzimit të kalimeve të bombarduesve ose avionëve mbështetës që marrin pjesë në këtë operacion.
Ministri i Ekonomisë, Carlos Cuerpo, deklaroi gjithashtu në radion Cadena SER se ky vendim është pjesë e politikës së qeverisë spanjolle për të mos marrë pjesë dhe as për të kontribuar në një luftë që, sipas tij, ka nisur në mënyrë të njëanshme dhe në shkelje të së drejtës ndërkombëtare./A.D