Kafeja është një nga pijet më të dashura në botë dhe për një arsye të mirë. Përveç shijes së këndshme dhe rritjes së energjisë, shkenca tregon se pirja e saj në kohën e duhur mund të shumëfishojë përfitimet shëndetësore.
Një studim i kohëve të fundit i botuar në European Heart Journal shqyrtoi modelet e konsumit të kafesë dhe lidhjen e tyre me vdekshmërinë dhe shëndetin kardiovaskular në më shumë se 42,000 të rritur në SHBA.
Rezultatet raportuan se ata që pinin kafe, qoftë me kafeinë apo pa kafeinë, midis orës 5 të mëngjesit dhe 12 të drekës, kishin një rrezik 16% më të ulët vdekjeje nga çdo shkak dhe një rrezik 31% më të ulët të sëmundjeve të zemrës, krahasuar me ata që nuk pinin fare kafe.
Në të kundërt, pirja e kafesë pasdite ose në mbrëmje nuk shoqërohej me të njëjtat përfitime, duke treguar se koha e konsumit është veçanërisht e rëndësishme.
Një nga pikat kryesore në lidhje me pirjen e kafesë në mëngjes është marrëdhënia e saj me kortizolin, hormonin e stresit që na zgjon. Ekspertët rekomandojnë pirjen e kafesë rreth 1-3 orë pas zgjimit, pasi kjo është koha kur nivelet natyrale të kortizolit fillojnë të ulen.
Kafeina mund të rrisë përkohësisht kortizolin, por konsumimi i saj shumë herët, kur nivelet janë tashmë të larta, mund të shkaktojë nervozizëm dhe një ulje të efektivitetit të tij të perceptuar. Pra, kafeja midis orës 9:30 dhe 11:30 të mëngjesit duket ideale, sipas studiuesve.