Last Updated on 09/10/2025 by adminfjala
Në Itali, nata e 9 tetorit 1963 do të mbetet e gdhendur si një nga tragjeditë më të mëdha të shekullit. Në luginën Vajont, në veri të Venetos, një rrëshqitje gjigante dheu nga mali Monte Toc u shemb mbi rezervuarin e digës. Brenda pak sekondash, mbi 260 milionë metra kub shkëmbinj ranë në liqenin artificial, duke zhvendosur një valë kolosale uji që kaloi përmbi digën 260 metra të lartë – një nga më të lartat në botë në atë kohë.
Uji i furishëm u përplas me një forcë apokaliptike mbi luginën poshtë, duke shkatërruar qytetin Longarone dhe fshatrat përreth. Brenda më pak se katër minutash, rreth 2000 njerëz humbën jetën, ndërsa qindra të tjerë u plagosën apo u zhdukën pa gjurmë. Dhjetëra fshatra u zhdukën nga harta; rruga, hekurudha dhe gjithçka që ishte ndërtuar me dekada, u fshi nga vërshimi.
Ironia e fatit ishte se diga vetë nuk u shemb. Ajo që ndodhi ishte rezultat i pakujdesisë njerëzore, sepse inxhinierët dhe autoritetet kishin paralajmërime të shumta për lëvizjet e tokës në mal, por ndërtuesit nuk ndaluan punimet. Vajont mbeti kështu një simbol i tragjedisë së parashikueshme, ku lakmia dhe shpërfillja e natyrës çuan në një katastrofë që mund të ishte shmangur.
Përgatiti: L.Veizi