Last Updated on 09/03/2026 by Anisa
Babai i tij ishte i njohur dhe kishte një numër të madh ndjekësish përpara se të bëhej udhëheqës suprem, por Mojtaba Khamenei është në disa aspekte i panjohur.
Mojtaba Khamenei është konfirmuar si udhëheqësi i ri suprem iranian – i treti në histori.
56-vjeçari pason të atin, Ajatollah Ali Khamenei, i cili u vra në kompleksin e tij në Teheran ditën e parë të luftës. Ai ishte udhëheqësi suprem për më shumë se 37 vjet.
Mojtaba nuk ishte aty dhe kështu mbijetoi, por nëna, gruaja dhe vajza e tij u vranë.
Udhëheqësi suprem zgjidhet nga asambleja e ekspertëve, një trup prej 88 dijetarësh islamikë të përzgjedhur për besnikërinë e tyre ndaj regjimit. Një ndërtesë ku kryheshin takimet u rrafshua në një sulm ajror, por mendohet se asnjëri prej tyre nuk ka qenë i pranishëm në atë kohë.
Pak dihet për Moxhtaba Khamenein. Ai është djali i dytë i Ajatollah Ali Khameneit dhe ka mbajtur një profil të ulët gjatë viteve, duke folur rrallë publikisht.
56-vjeçari është një konservator i linjës së ashpër që shërbeu në batalionin Habib të Korpusit të Gardës Revolucionare Islamike (IRGC) gjatë Luftës Iran-Irak në vitet 1980 dhe është lidhur me shtypjen e dhunshme të protestave në vendin e tij.
Koha e tij në IRGC e ndihmoi të ndërtonte lidhje me ndikim me burra që tani mbajnë pozicione të larta në vend.
Tara Kangarlou, autore e librit “Rrahjet e Zemrës së Iranit”, i tha Sky News se Mojtaba Khamenei “mban shumë pushtet në aparatin e IRGC-së; ai ka duart e tij në pothuajse çdo gjë në Iran: shumë para, pushtet dhe ndikim”.
Khamenei është nën sanksione të SHBA-së, por thuhet se ka grumbulluar një perandori të vlefshme pronash në të gjithë botën, përfshirë Londrën.
Ndryshe nga i ati, i cili ishte një intelektual i njohur, një studiues i poezisë persiane dhe një orator i fortë me një numër të madh ndjekësish brenda Iranit përpara se të bëhej udhëheqës suprem, Khamenei nuk ka një reputacion të fortë në vend.
Pozicioni i udhëheqësit suprem nuk është vetëm autoriteti përfundimtar në Iran , ai (dhe është gjithmonë një burrë) është mbrojtësi i Republikës Islamike.
Edhe pse Khamenei studioi në qytetin e shenjtë të Qomit, ai ka qenë vetëm një klerik i rangut të mesëm, jo një ajatollah i lartë.
Duke trashëguar rolin, asambleja e ekspertëve në fakt ka krijuar një dinasti – jo shumë ndryshe nga një monarki. Por iranianët nuk i pëlqejnë dinastitë: ata përmbysën dinastinë Qajar në vitin 1925 dhe monarkinë Pahlavi në vitin 1979.
Edhe pse Khamenei ka ndikim në qarqet e brendshme të politikës iraniane, ai kurrë nuk ka mbajtur poste publike dhe as nuk është zgjedhur në ndonjë rol qeveritar.
Në vitin 1989, kur babai i tij u bë udhëheqës suprem, ai punoi në zyrat e tij dhe u bë “rojtari kryesor” .
Ai është i afërt me IRGC-në, dhe kjo është e rëndësishme, por kjo dëshmon që përkrahësit e vijës së ashpër ruajnë njëfarë pushteti – gjë që nuk është shenjë e mirë për negociatat për t’i dhënë fund luftës./fjala.al-A.D