Last Updated on 22/09/2026 by Anisa
Ish-drejtori i Përgjithshëm i Policisë së Shtetit, Ilir Proda, është paraqitur këtë të martë në ambientet e Prokurorisë së Posaçme (SPAK), në kuadër të hetimeve për dosjen e AKSHI-t.
Paraqitja e tij në SPAK vjen pas kontrollit të banesës së tij nga agjentët e Byrosë Kombëtare të Hetimit. Me urdhër të GJKKO-së, hetuesit kanë ushtruar kontroll në banesën e Prodës, ku kanë sekuestruar telefonin e tij, një laptop, si dhe disa USB dhe CD, materiale që tashmë janë administruar në kuadër të hetimit.
Kontrollet janë zhvilluar në orët e para të mëngjesit në rrugën “Frosina Plaku”, pranë shkollës “Gustav Mayer”. Në zonën pranë pallatit ku banon Proda është konstatuar një automjet i BKH-së, ndërsa në terren ka qenë edhe një patrullë e forcave “Shqiponja”.
Aksioni, i zhvilluar me kërkesë të prokurorëve të Posaçëm Bledar Maksuti dhe Altin Dumani, nuk është kufizuar vetëm te banesa e ish-kreut të Policisë. Kontrolle janë kryer edhe në banesat e personave të tjerë, përfshirë zyrtarë dhe ish-zyrtarë.
Në të njëjtën dosje është marrë masë sigurie edhe ndaj drejtueses së Shërbimit Informativ të Shtetit, Vlora Hyseni. GJKKO ka caktuar ndaj saj “arrestin në shtëpi” dhe pezullimin nga detyra. Sipas të dhënave të raportuara, Hyseni ndodhet jashtë Shqipërisë dhe masat ende nuk i janë komunikuar zyrtarisht.
Ndërkohë, BKH ka ushtruar kontroll edhe në banesën e saj.
Hetimet lidhen me një fraksion të dosjes së AKSHI-t, në kuadër të së cilës është arrestuar më herët Ergys Agasi. Sipas të dhënave të raportuara, në telefonat e Agasit dhe Uljan Shpatarakut janë gjetur komunikime që po verifikohen nga autoritetet.
Deri më tani nuk është bërë publik një njoftim i plotë zyrtar mbi akuzat konkrete ndaj personave të përfshirë apo mbi rrethanat e plota të masave të sigurisë.
Proda në krye të Policisë
Ilir Proda u emërua Drejtor i Përgjithshëm i Policisë së Shtetit në tetor 2024 dhe e mbajti këtë detyrë deri më 1 mars 2026, kur u shkarkua nga kryeministri Edi Rama.
Më herët, Proda kishte drejtuar Komisariatin e Elbasanit, ku emri i tij ishte përmendur edhe në kuadër të dyshimeve për dekonspirimin e një operacioni.
Në shtator 2025 u raportua se SPAK kishte sekuestruar telefonin e Prodës në kuadër të hetimit për dyshimet mbi dekonspirimin e operacionit të 31 korrikut 2024 kundër grupit të vëllezërve Çopja në Elbasan.
Sipas raportimeve, hetimi përfshinte edhe efektivë policie dhe agjentë të BKH-së që kishin pasur dijeni për operacionin.
Tashmë, paraqitja e Prodës në SPAK vjen në një moment kur hetimet për dosjen e AKSHI-t kanë sjellë kontrolle dhe masa sigurie ndaj disa personave, ndërsa pritet që Prokuroria e Posaçme të japë më shumë detaje mbi zhvillimet e fundit./ad