Last Updated on 14/10/2026 by Monika
Rasti i bujshëm i kartonit të kuq të dhënë dhe më pas të anuluar për sulmuesin amerikan, Folarin Balogun, ka lënë një shenjë të pashlyeshme në historinë e Kupës së Botës.
Ndërhyrja e tij e ashpër ndaj Muharemoviç në sfidën mes Shteteve të Bashkuara dhe Bosnjës u ndëshkua fillimisht me përjashtim, por vendimi u hodh poshtë nga Komisioni Disiplinor. Ky episod shkaktoi një tërmet të vërtetë në botën e futbollit, pasojat e të cilit vazhdojnë të ndihen edhe sot.
Për të justifikuar atë ndërhyrje direkte që ktheu mbrapsht skualifikimin, FIFA po përgatitet të ndryshojë rregulloren fiks tre muaj pas ngjarjes. Anëtarëve të këshillit u është dërguar tashmë një dokument zyrtar që propozon modifikimin e nenit 27.
Ky ndryshim synon të saktësojë situatat në të cilat një dënim nuk mund të pezullohet, duke theksuar se përjashtimi me një apo më shumë ndeshje është automatik dhe nuk mund të apelohet.
Nëse ky amendament miratohet, ai do të prodhojë efekte vetëm për të ardhmen dhe nuk do të ketë fuqi prapavepruese. Përmes kësaj lëvizjeje, qeveria botërore e futbollit po përpiqet të lajë duart, duke u justifikuar se rregullorja e vjetër ishte e paqartë për situata të tilla.
E gjithë kjo manovër vjen pas deklaratës së presidentit amerikan, Donald Tramp, i cili zbuloi publikisht se kishte telefonuar mikun e tij Gianni Infantino, për t’i bërë presion me pretendimin se përplasja mes lojtarëve ishte e paqëllimshme.
Ajo telefonatë e ktheu kartonin e kuq në një leje për të zbritur rregullisht në fushë për sulmuesin e SHBA-së, duke ngjallur polemika të pafundme. Ironikisht, ky favorizim u kthye në një bumerang për amerikanët, të cilët u eliminuan thellë me rezultatin 4-1 nga Belgjika.
Propozimi i ri i FIFA-s bie në kundërshtim të hapur me qarkoren e saj për Botërorin, ku thuhej qartë se skualifikimet ishin automatike./mxh